"26 დღის განმავლობაში, მამაჩემი მხოლოდ ერთხელ მოვიდა... ფანჯრიდან ველაპარაკე" - რას ყვება ნიკოლოზ გამყრელიძე, რომელიც კორონავირუსისგან გამოჯანმრთელდა
პაციენტი N10 - ნიკოლოზ გამყრელიძე პირველი პირია, რომელსაც პერსონალური მონაცემების დაცვა არ უთხოვია და კორონავირუსის დადგენისთანავე, ინფიცირების შესახებ სოციალურ ქსელში ვრცელი პოსტი გამოაქვეყნა.
26-დღიანი მკურნალობის შემდეგ, სს საქართველოს ჯანდაცვის ჯგუფის გენერალური დირექტორი სრულად გამოჯანმრთელდა და ისევ პირველია, ვინც კორონავირუსზე მედიასთან ვრცლად საუბარს დათანხმდა.
როგორი იყო პირველი ემოცია, ბოქსირებულ პალატაში გატარებული 26 დღე, როგორ აფასებს ჯანდაცვის სისტემის სტრატეგიას ვირუსთან ბრძოლაში და ზოგადად, როგორია ინფიცირებულისა და შემდეგ უკვე გამოჯანმრთელებული პირის მიერ შეფასებული COVID-19 - ნიკოლოზ გამყრელიძემ ტელეკომპანია "პალიტრანიუსის" კითხვებს გულწრფელად უპასუხა.
- ახლა უკვე კარგად ვარ, იმიტომ რომ სახლში ვარ, მართალია ჯერ ისევ თვითიზოლაციაში, როგორც არის რეკომენდაცია, მაგრამ უკეთესია სახლში ვიდრე კლინიკაში. ახლა სრულად გამოჯანმრთელებული ვარ, ორჯერ გამიკეთდა ტესტი, როგორც ეს პროტოკოლით მეკუთვნის და ორივეჯერ უარყოფითი ვიყავი, შესაბამისად ვითვლები სრულად გამოჯანმრთელებულად. თვითიზოლაციის პერიოდი დაახლოებით ერთ კვირაში, 10 დღეში დამისრულდება.
- ქრონოლოგიურად რომ მივყვეთ, როდის გამოგივლინდათ ვირუსის დამახასიათებელი პირველი ნიშნები და რა სიმპტომები გქონდათ სანამ ტესტს გაიკეთებდით?
- ქრონოლოგიურად რომ მოვყვეთ, მე მქონდა შევხედრა ერთ-ერთ ჩემ თანამშრომელთან. ეს იყო 2 მარტს გვიან საღამოს, მას არანაირი სიმპტომი არ აღენიშნებოდა, სამ მარტს ჩემ თანამშრომელს აღმოაჩნდა სიმპტომები და ეგრევე მოექცა თვითიზოლაციაში. 5 მარტს მას დაუდასტურდა ვირუსი და ხუთ მარტს დილიდან გამომაჩნდა სიმპტომატიკა მეც.
ძალიან დაბალი სიცხე და მშრალი ხველა მქონდა, როგორც კი ეს ნიშნები გამომაჩნდა, მაშინვე წავედი თვითიზოლაციაში. 6 მარტს ამიღეს სინჯი და საღამოს უკვე დამიდგინდა კორონავირუსი.
რა თქმა უნდა, ყველას გვეშინია რაღაცის, მითუმეტეს დაავადების. თუმცა, ამ დაავადებაზე, ალბათ უფრო მეტი ინფორმაცია მქონდა. ჩემი შიშები იმ წუთს ალბათ უფრო სხვა კუთხით იყო: ვფიქრობდი ვის გადავდე, ჩემ მეუღლეს, ჩემ შვილებს თუ მეგობარს და თანამშრომელს...
- თქვენს კლასტერს, რეალურად "გეფას" კლასტერს უწოდებენ, ეს ჯგუფი ფართოდ არ გავრცელდა, არა?!
- ჩემი კლასტერი მე საიდანაც დავიმფიცირდი, საბედნიეროდ ჩვენ მოვახერხეთ და ის ჯაჭვი გავწყვიტეთ. ოპერატიული იზოლაციებით მოვახერხეთ. ეს არის კლასიკური მაგალითი, იზოლაცია და თვითიზოლაცია როგორ შველის. ეს კლასტერი, ეს ჯაჭვი რომ არ გაგვეწყვიტა, შეიძლება ძალიან დიდი ყოფილიყო, რამდენიმე ასეული ადამიანი მაინც დაინფიცირებულიყო ამ ე.წ. იტალიური კლასტერით.
"გეფა" არის კომპანია რომელიც იმ ჯგუფში შედის, რომელსაც მე ვხელმძღვანელობ, ამიტომ ჩვენს კლასტერს ვეძახი. კარგი იყო, რომ ჯაჭვი გაწყდა თვითიზოლაციებით.
- მედიამ ვერ მოახერხა შეეხედა ბოქსირებულ პალატებში, ამიტომ მოგვიყევით, რა ვითარებაა პალატაში, სადაც ინფიცირებული ადამიანია მოთავსებული, როგორია მკურნალობის კურსი?
- ბოქსირებულ პალატაში არც გისურვებთ შეიხედოთ, თუმცა წარმოიდგინეთ ინფექციური ბოქსი, ჩაკეტილი ხარ 10 კვადრატულ მეტრში, საიდანაც ვერ გადიხარ. არც თუ ისე სასიამოვნოა იქ ყოფნა, იმიტომ რომ ვერც ვერავინ შემოდის, გარდა ძალიან გულისხმიერი და ძალიან კარგი მედპერსონალისა, რომელიც სათანადოდ არის აღჭურვილი. ეს ოთახი არის, სადაც ზიხარ და ბევრი დრო გაქვს მუშაობისთვის და ფიქრისთვის.
26 დღე... ეს დღეები ძალიან შემიმსუბუქა იქ მყოფმა ხალხმა. მკურნალობა ძირითადად მიდის სიმპტომურად, პრეპარატს, რომელსაც მე ვიღებდი 2 კვირის წინ, ამერიკის პრეზიდენტმა გამოაცხადა, რომ უნდა იყოს გამოყენებული მკურნალობაში. მე კი თენგიზ ცერცვაძემ "პლაქველინი" პირველივე დღეს დამინიშნა. ეს იყო ერთადერთი პრეპარატი, რომელსაც ვიღებდი. ჩემ შემთხვევაში ძალიან მსუბუქად წარიმართა დაავადება. იქ სადაც მძიმე პნევმონია ერთვება და სუნთქვის უკმარისობაა, სისტემური მკურნალობის კურსი ინიშნება.
უნდა გვესმოდეს, რომ კორონავირუსი ნაკლებად საშიშია ახალგაზრდა ორგანიზმებისთვის, მათთვის ვისაც ჯანმრთელი ორგანიზმი აქვს. მაგრამ იქიდან გამომდინარე, რომ კორონავირუსი ძალიან მარტივად გადამდებია, ამ კუთხით არის საშიში.
წარმოიდგინეთ, მე ჩემ თანამშრომელს არც ჩავხუტებივარ, არ გადამიკოცნია, მაგიდაზე მედო "სანიტაიზერი" და დღეში რამდენჯერმე ვიმუშავებდი ხელებს, ამ ადამიანთან უბრალოდ ერთ მაგიდასთან ვიჯექი და გადამედო მარტივად
ვირუსი მარტივად გადამდებია, ამიტომ უნდა გავუფრთხილდეთ თავსაც და ერთმანეთსაც. კორონავირუსი საშიშია ასაკში მყოფი ადამიანებისთვის და შეიძლება სავალალოდ დამთავრდეს მათთვის, ვისაც ქრონიკული დაავადებები აქვს.
- სამ კვირაზე მეტი იყავით პალატაში - ბატონი ამირანი, მამათქვენი არც ერთხელ არ მოსულა თქვენს სანახავად?
- გულახდილად გეტყვით, ჩემს პალატაში შემოდიოდნენ მხოლოდ ექიმები, რომელთა მიმართ უზომოდ მადლიერი ვარ, იმიტომ რომ მორალურად ძალიან გამაგრებს, როდესაც ვიღაც ახლოდან გელაპარაკება, რამდენიმე ექთანი და სანიტარი შემოდიოდა, მათი უზომოდ მადლიერი ვარ.
მამაჩემი ვერ შემოვიდოდა იქ ბევრი მიზეზის გამო, გესმით რატომაც. ფანჯარა მქონდა, რომელსაც ვაღებდი და ვიყურებოდი ქუჩაში. ერთადერთხელ მოვიდა - ქუჩაში დადგა, შორს, მობილურით ვლაპარაკობდით და დისტანციაზე ვხედავდით ერთმანეთს, რვა ათი მეტრის დისტანციაზე, ის ქუჩაში იდგა, მე ფანჯრიდან ველაპარაკებოდი - ეგ იყო და ეგ.
- როგორ ამხნევებთ მამას და როგორი შეგრძნებაა, როდესაც იცი, რომ ვირუსის წინა ხაზზე შენი მშობელია?
- მარტო მე არა, მთელი ოჯახი ვცდილობთ რომ გავამხნევოთ, მაგრამ ბევრი გამხნევება არ სჭირდება ჩვენგან, მორალურად საკმაოდ მდგრადი ხასიათი აქვს და ამ კუთხით არ გვეშინია.
ჩვენ რაც შეგვიძლია ვქნათ, ეს სოციალური პასუხისმგებლობა გავითავისოთ და პირველები ვიყოთ, ვინც რეკომენდაციებს გავითვალისწინებთ. ჩემი დაინფიცირება ძალიან კარგი მაგალითია, რომ დაცული არავინ არ არის - თუ არ ვიქნებით ყურადღებით, ძალიან საშიში გახდება ეს ყველაფერი
მე უსიმპტომო ვიყავი თითქმის, იმ შაბათ-კვირას დიდი ალბათობით მოვინახულებდი ჩემ ბებიას, რომელიც 92 წლის არის, ასევე ქრონიკული დაავადების მქონეა და დიდი ალბათობით შეიძლებოდა მომეკლა. ცუდად ჟღერს, მაგრამ ეგაა რეალობა.
- სტრატეგია, რომელიც აირჩია ხელისუფლებამ, რამდენად სწორია, რამდენად გაამართლა?
- ჩემი აზრით პირველ რიგში კრიზისის სწორად მართვამ და კრიზის მენეჯმენტის თავში სწორი ხალხის ყოფნამ, იმ მომენტში გაამართლა. მნიშვნელოვანი იყო, რომ ამ დროს გადაწყვეტილებები მიიღო მწყობრად და მნიშვნელოვანია, რომ ამ დროს არ შეგეშინდეს არაორდინალური გადაწყვეტილებების.
მოხარული ვარ, რომ ხელისუფლება დღეს მწყობრ გადაწყვეტილებებს იღებს, სწორედ ეს დისციპლინა და სწორი გადაწყვეტილებები არის ის, რამაც აქამდე წარმატებით მოგვიყვანა. თუმცა, ისიც უნდა გავითვალისწინოთ, რომ ყველაფერი წინ არის და არ გვაქვს მოდუნების უფლება, იმიტომ რომ შემდეგი კვირები იქნება ძალიან რთული. მოსახლეობამ ჩვენი პასუხისმგებლობა თუ არ ავიღეთ, წავაგებთ ვირუსთან და ჩვენთვის ეს წაგება ძალიან ძვირი იქნება, როგორც ადამიანის ჯანმრთელობის, ისე ეკონომიკის მხრივ.
ესაუბრა ეკა წივწივაძე
ქუთაისში, ე.წ. ცხელების ცენტრში, ერთ პაციენტს კორონავირუსი დაუდასტურდა
"ვინც ფიქრობს, რომ შეიძლება ტაძარში არ მისვლით თავი დაიცვას, დარჩეს სახლში", - დეკანოზი ანდრია ჯაღმაიძე
