"შეუძლებელი შეძლო: 10 ღღით მეტხანს აცოცხლა დედა..." - რას წერს ექიმ ლევან რატიანზე ჟურნალისტი ვასილ დაბრუნდაშვილი

ჟურნალისტი ვასილ დაბრუნდაშვილი თსსუ-ს პირველი საუნივერსიტეტო კლინიკის დირექტორის ლევან რატიანის პროფესიონალიზმზე წერს. ჟურნალისტის დედა მძიმედ ავადმყოფობდა და 2019 წლის იანვარში გარდაიცვალა. როგორც დაბრუნდაშვილი წერს, ბოლო დღეები ქალმა სწორედ საუნივერსიტეტო კლინიკაში, რატიანის ზედამხედველობის ქვეშ გააატარა და ამ ექიმმა მაშინ შეუძლებელი შეძლო:

"ექიმი ლევან რატიანი ყველა გადარჩენილ სიცოცხლეზე რომ საუბრობს, გული მიჩქარდება, მგონია რომ მასთან ერთად ვიმარჯვებ, რაღაცას ვამარცხებ და მიხარია.

25 დეკემბერი რაღაც საშინელი საღამო იყო, მეც მაგრად დაღლილი, დედა კიდევ უფრო მეტად. ერთი კლინიკიდან უნდა გადაგვეყვანა მეორეში მარტო რომ არ ეგრძნო თავი, მასთან ჩავჯექი სასწრაფოს მანქანაში, ხელი მაგრად ჩამჭიდა, მთელი გზა ბევრ რამეზე ვისაუბრეთ, მებოდიშებოდა, რომ ძალიან გაწვალებ მაგრად გადაგღალეო. ვუღიმოდი და ვეუბნებოდი, რომ გავიმარჯვებდით და ფეხზე დავაყენებდით, თვალები უბრწყინავდა ამ დროს...

ექიმს და კლინიკას ვცვლიდით, იმიტომ რომ მეტი შანსი გვქონოდა. მახსოვს, რომ მივედით მიმღებში დაგხვდა ლევანი მერე მისი მოადგილე ჩამოიყვანა, კიდევ განყოფილების გამგე, შემდეგ სხვა ექიმი, ჩაატარა კვლევები და შეძლო შეუძლებელი - კიდევ 10 ღღით მეტხანს აცოცხლა. ყოველ დილით, როცა შემოვლა იყო რეანიმაციაში, დედას ლევანთან ერთი თხოვნა ჰქონდა, მისი მობილურით დაერეკა ჩემთან და ჩემი ხმა გაეგო. ასე გრძელდებოდა დღეები და ბოლოს ისევ მისი მობილურით გავიგე დედას ხმა...

ყველაფერი გააკეთა, იბრძოლა ამ კაცმა და ახლაც ვიცი, რომ ასე აკეთებს ყველა სიცოცხლის გადასარჩენად, თავის საქმის უბადლო ოსტატია. მადლობა ლევანს და მადლობა ექიმებს, რომლებიც ხშირად წარმოუდგენელ გმირობას ჩადიან" - წერს ვასილ დაბრუნდაშვილი "ფეისბუქის" პირად გვერდზე.

თბილისის სახელმწიფო სამედიცინო უნივერსიტეტის პირველ საუნივერსიტეტო კლინიკაში ამჟამად 77 პაციენტი იმყოფება, მათგან 17 კორონავირუსითაა ინფიცირებული. როგორც ლევან რატიანმა გუშინ ჟურნალისტებს განუცხადა, ერთ-ერთი უმძიმესი პაციენტი უკვე სრულად გამოაჯანმრთელეს და ის კლინიკას მალე დატოვებს:

"კიდევ ერთი მაგალითი იმისი, რომ კოვიდი არ არის მკვლელი ამ ქალბატონის მაგალითზე შემიძლია გითხრათ. ქალბატონი იყო უმძიმესად: მწვავე რესპირატორული სინდრომით, მორბიტული სინდრომით, გულის უკმარისობით, არტერიული ჰიპერტენზიით, ჭარბი წონით. ამ ეპატზე, მისი მდგომარეობა მკვეთრად არის გაუმჯობესებული. მივიღებთ საბოლოო პასუხს და ხვალ თვითიზოლაციის პირობებში, პროტოკოლის დაცვით გაეწერება“, - განაცხადა რატიანმა.