20 მარტოხელა დედას სურსათი და პირველადი მოხმარების ჰიგიენური საშუალებები გადაეცა

მარტოხელა დედათა და ბავშვთა დაცვის ასოციაციის "მომავლის მზის" ბენეფიციარ 20 მარტოხელა დედას, ბიზნესმენმა ნინო კაპანაძემ სურსათი და პირველადი მოხმარების ჰიგიენური საშუალებები გადასცა.

“ჩვენი ბიზნესი მსოფლიოსა და საქართველოში არსებული გასაგები მიზეზების გამო გაჩერებულია. თუმცა, ჩვენ არ ვჩერდებით, პირველივე დღიდან მაწუხებდა სოციალურად დაუცველების მდგომარეობა. ვნახე ბევრი ინიციატივა, რაც არაჩვებულებრივია. მეუღლესთან, მეგობრებთან და ჩვენს გუნდთან ერთად შევეცადეთ გვეპოვნა ის ადამიანები, ვინც ყურადღების მიღმაა დღემდე დარჩენილი.

ასე აღმოვაჩინე მარტოხელა დედები, რომელთაც ბრძოლა შვილების აღზრდისათვის არა მხოლოდ ეპიდემიის პირობებში, არამედ მთელი ცხოვრების განმავლობაში უწევთ“ - ამბობს ნინო კაპანაძე.

სურსათი, ჰიგიენის საშუალებები, ბავშვებისათვის საგანმანათლებლო და გასართობი საშუალებები, სამოსი - ეს ის ჩამონათვალია, რომელიც ნინო კაპანაძემ მის გუნდთან ერთად ბენეფიციარებს გადასცა. “შალის ჯორჯიას” დამფუძნებელი ამბობს, რომ ეს არ იქნება ერთჯერადი დახმარება და ვიდრე საგანგებო და პანდემიური მდგომარეობა არ დასრულდება, მათ ყურადღება არ მოაკლდებათ და სურსათს რეგულარულად მიაწვდიან.

"დიდი მადლობა მინდა გადავუხადო ბიზნესმენ ნინო კაპანაძეს, გაწეული უანგარო დახმარებისთვის. ამ ძნელბედობის ჟამს ასოციაციის 20 მარტოხელა დედას პატრონაჟი გაუწია და მათ ხვალინდელი დღის აღარ ეშინიათ. ასევე დიდი მადლობა ოთარ ქირიას სწორი კომუნიკაციისა და სწორად შერჩეული სეგმენტისათვის, რადგან მარტოხელა დედას სჭირდება გასმაგებულად ჩვენი თანადგომა" - აღნიშნა "მომავლის მზის" დამფუძნებელმა თეო ფირანიშვილმა.