"ნიკა გამყრელიძე კლინიკურად გამოჯანმრთელებულია" - როდის გაწერენ "ევექ­სის" წარმომადგენელს ინფექციურიდან

"ევექსის" სამეთვალყურეო საბჭოს წევრი ნიკოლოზ გამყრელიძე კორონავირუსისგან საბოლოოდ გამოჯანმრთელებულ პაციენტებს შორის ჯერჯერობით არ არის, თუმცა, მას საავადმყოფოდან მაქსიმუმ 2-3 დღეში გაწერენ.

როგორც ინფექციურ საავადმყოფოში „ინტერპრესნიუსს“ განუცხადეს, ვირუსზე შესაბამისი კვლევა მას ხვალ ჩაუტარდება.

ინფექციურში აცხადებენ, რომ პაციენტი უკვე კლინიკურად გამოჯანმრთელებულია და რადიოლოგიურადაც კარგი მდგომარეობა აქვს.

მათივე ცნობით, ორი დღის წინ მას ჩაუტარდა გამოკვლევა კორონავირუსზე, რა დროსაც ანალიზმა სუსტად დადებითი აჩვენა.

„ნიკა გამყრელიძე კლინიკურად გამოჯანმრთელებულია. მას ვირუსზე კიდევ ერთი კვლევა ხვალ ჩაუტარდება, რომელიც 24 საათში განმეორდება და უარყოფითი პასუხის შემთხვევაში, პაციენტს კლინიკიდან გაწერენ" - განაცხადეს ინფექციურ საავადმყოფოში.

შეგახსენებთ, რომ ნიკა გამყრელიძეს ვირუსი მარტის დასაწყისში დაუდგინდა. ის მისი თანამშრომლისგან დაინფიცირდა, რომელიც თავის მხრივ, იტალიაში იმყოფებოდა.