ყველასათვის საყვარელი წიგნის „თამაში ჭვავის ყანაში“ ავტორის კიდევ ორი ახალი წიგნი ქართულ ენაზე

ფსიქოლოგიური და ინტელექტუალური ნაწარმოებების ოსტატი, უმეტესად ბავშვი და მოზარდი გმირებით, რომლებიც მწვავედ განიცდიან კონფლიქტებს და შესაბამისად, ჩნდება ტრაგიზმი, გაუცხოება, მარტოობა, დაბნეულობა, დეპრესია, პროტესტი საზოგადოებაში გაბატონებული სიყალბისა და მანკიერებისადმი – ეს მე–20 საუკუნის ერთ–ერთი გამორჩეული ავტორი ჯერომ სელინჯერი და მისი შემოქმედებაა.

ჯერომ დევიდ სელინჯერი 1919 წლის 1-ელ იანვარს დაიბადა ნიუ-იორკში. მამამისი, სოლომონ სელინჯერი ლიტვური წარმომავლობის ებრაელი გახლდათ. ნიუ-იორკში თავისი დახლი ჰქონდა და ყველითა და ლორით ვაჭრობდა. მამა ცდილობდა, შვილისთვის კარგი განათლება მიეცა. 1936 წელს ჯერომმა სამხედრო სასწავლებელი დაამთავრა პენსილვანიის შტატში. იქვე შექმნა თავისი პირველი მოთხრობები. მოგვიანებით, უმაღლესი განათლების მიღება გადაწყვიტა და 1939 წელს კოლუმბიის უნივერსიტეტში ჩააბარა. იქვე მოისმინა ლექციათა კურსი მოკლე მოთხრობების შესახებ, რომელსაც ჟურნალ "სტორის" რედაქტორი უილიამ ბერნეტი კითხულობდა. ეს ლექციები მოგვიანებით ძალიან გამოადგა. თუმცა მომავალ მწერალს სწავლა არ დაუმთავრებია, არც განსაკუთრებული წარმატებები ჰქონია და არც კარიერული მიზანსწრაფვა, რითაც მამის უკმაყოფილებას იწვევდა. საბოლოოდ, მამას წაეჩხუბა და სახლიდან წავიდა.

1942 წელს ჯარში გაიწვიეს. საოფიცრე-სერჟანტული სკოლა დაამთავრა. ერთ წელიწადში სერჟანტის რანგში კონტრდაზვერვაში გადაიყვანეს და ნეშვილში გაგზავნეს. 1944 წელს სერჟანტი სელინჯერი ნორმანდიაში დესანტის გადასხმაში მონაწილეობდა, მუშაობდა სამხედრო ტყვეებთან, მონაწილეობდა საკონცენტრაციო ბანაკების გათავისუფლებაში.

სელინჯერის წარმატებული სამწერლო კარიერა ნიუ–იორკულ ჟურნალებში მოკლე მოთხრობების გამოქვეყნებით დაიწყო. მისი პირველი მოთხრობა "ახალგაზრდა ადამიანები" ჟურნალ "სტორიში" დაიბეჭდა 1940 წელს. პირველი სერიოზული პოპულარობა მოუტანა მოკლე მოთხრობამ "ბანანა თევზის ამინდი".

პირველი მოთხრობის გამოქვეყნებიდან, თერთმეტი წლის შემდეგ, სელინჯერმა თავისი გამორჩეული რომანი "თამაში ჭვავის ყანაში" გამოაქვეყნა, რომელსაც ერთნაირი მოწონებით შეხვდა კრიტიკაც და მკითხველიც. რომანი დღემდე დიდი პოპულარობით სარგებლობს ახალგაზრდებს შორის. თუმცა იმ პერიოდში წიგნი აშშ-ის რამდენიმე შტატსა და რამდენიმე ქვეყანაში აიკრძალა, დეპრესიულობისა და უხამსი ლექსიკის გამო, თუმცა დღეს ბევრ ამერიკულ სკოლაში შედის წასაკითხად რეკომენდებულ ლიტერატურაში.

მას მერე, რაც მისმა რომანმა პოპულარობა მოიპოვა, სელინჯერმა განდეგილური ცხოვრება დაიწყო. უარს ამბობდა ინტერვიუებზე. 1965 წლის შემდეგ ნაწარმოებების გამოქვეყნება შეწყვიტა, მხოლოდ თავისთვის ქმნიდა. სიცოცხლის უკანასკნელ წლებში, პრაქტიკულად, არ ურთიერთობდა გარე სამყაროსთან, ქალაქ კორნიშში დიდ სახლში ცხოვრობდა, რომელსაც ქვეყნიერებისგან მაღალი ღობე ყოფდა. ფილოსოფიას ჩაუღრმავდა, სულს იწრთობდა, ბუდიზმით, ინდუიზმით, იოგათი დაკავდა და არატრადიციულ მედიცინას ეუფლებოდა...

სელინჯერი ბუნებრივი სიკვდილით გარდაიცვალა 2010 წლის 27 იანვარს, 91 წლის ასაკში.

ქართველი მკითხველი მას ძირითადად რომანით „თამაში ჭვავის ყანაში“ იცნობს, თუმცა ქართულ ენაზე გამოცემულია მისი მოთხრობებიც - „9 მოთხრობა“. სულ ახალახან კი, გამომცემლობა „პალიტრა L-მა” გამოსცა მისი ორი ახალი წიგნი: "ჭერი ასწიეთ, დურგლებო და სიმორი, შესავალი“ და "ფრენი და ზუი".

”ჭერი ასწიეთ, დურგლებო” პირველ პირში მოთხრობილი ამბავია. მთხრობელი ბადი გლასია, რომელიც აღწერს მის უჩვეულო ოჯახს და რთულ, თუმცა თბილ ურთიერთობას და-ძმებს შორის. ”სიმორი, შესავალი” ასევე გლასების ოჯახზე მოგვითხრობს. კერძოდ სიმორის - უფროსი ძმის შესახებ, რომელიც ოჯახის ყველასგან გამორჩეული წევრია. იგი ცხოვრებას თვითმკვლელობით ამთავრებს. სელინჯერის ”ფრენისა და ზუის” მსგავსად ძენ ბუდიზმისა და ინდური ფილოსოფიის თემა აქაც ერთ-ერთი მთავარია.

ჯერომ სელინჯერის ”ფრენი და ზუი” გლასების ოჯახის შესახებ შექმნილი მოთხრობების ციკლის ნაწილია. წიგნი 1961 წელს გამოიცა და ორ მოზრდილ მოთხრობას აერთიანებს. ფრენი და ზუი (და-ძმა). რთული ოჯახური ურთიერთობები, კონფლიქტი გარესამყაროსთან და საკუთარ თავთან, ძენ ბუდიზმი და ინდური ფილოსოფია წიგნის მთავარი თემებია. ზედმეტად მგრძნობიარე და გაუწონასწორებელ მთავარ გმირებს მწერალი განსაკუთრებული იუმორითა და სითბოთი აღწერს. რთულ, თუმცა თბილ ურთიერთობას და-ძმებს შორის.

„პალიტრა L-ის“ მიერ გამოცემული ავტორის ოთხივე წიგნი გამორჩეული დიზაინისაა. მათ სადა, მინისმალისტური დიზაინის ყდები აერთიანებს.