გუდაურში თვითიზოლაციაში არიან რესტორნის თანამშრომლები, სადაც სავარაუდოდ, კორონავირუსით დაავადებული ჩეხი ტურისტები იმყოფებოდნენ

გუდაურში მდებარე რესტორნის. "მთვრალი ალუბალი" ადმიისტრაცია სოციალურ ქსელში საგანგებო განცხადებას ავრცელებს:

"ძვირფასო სტუმრებო, დღეს დაგვირეკეს დაავადებათა კონტროლის ცენტრიდან და შეგვატყობინეს, რომ 4 მარტს გუდაურში ჩამოვიდა 6 ჩეხი ტურისტი, რომელთაგან 3-ს დღეს აღმოაჩნდა კორონავირუსი. ამ ტურისტებმა გამოკითხვის დროს აღნიშნეს, რომ თავიანთი ვიზიტის განმავლობაში ყოველდღე დადიოდნენ რესტორან "მთვრალ ალუბალში".

ჩვენ ყველანი ვართ თვითიზოლაციაში, რესტორანი დაკეტილია, 2 ჩვენი თანამშრომელი მაღალი სიცხით ელოდება კატასტროფის ბრიგადას...

ვინც ამ დღეებში იყავით "მთვრალ ალუბალში", გთხოვთ, იზრუნოთ თქვენს და თქვენი გარშემომყოფების ჯამრთელობაზე, გთხოვთ, რომ მიმართოთ კონსულტაციისთვის სამედიცინო დაწესებულებას...

იმედს ვიტოვებ, რომ ყველაფერი კარგად იქნება და არავის არაფერი არ აღმოგვაჩნდება ...

გისურვებთ ჯანმრთელობას", - აღნიშნულია განცხადებაში.

თუმცა, როგორც რამდენიმე წუთის წინ გამართულ ბრიფიგზე ინფექციური საავადმყოფოს სამედიცინო დირექტორმა, მარინა ეზუგბაიამ განაცხადა, გუშინ დადასტურებულ შემთხვევათაგან, კორონავირუსით ინფიცირებულთა შორის ჩეხეთის მოქალაქეები არ არიან.

ცნობისთვის, საქართველოში ამ დროის მონაცემებით, კორონავირუსის დადასტურებული შემთხვევა - 33-ია, მათგან 3 ახალი შემთხვევის შესახებ გუშინ გახდა ცნობილი, კარანტინის რეჟიმში 427 პირი იმყოფება, ხოლო სტაციონარში მეთვალყურეობის ქვეშ - 73.