საგარეო უწყება - თურქეთ-საქართველოს შორის ფრენები 20 მარტამდე გახანგრძლივდა

საქართველოს საგარეო საქმეთა სამინისტროს ინფორმაციით, თურქეთ-საქართველოს შორის შეთანხმების თანახმად ორ ქვეყანას შორის ფრენები გახანგრძლივდება მიმდინარე წლის 20 მარტის 24:00 საათამდე.

როგორც უწყების მიერ გავრცელებულ ინფორმაციაშია აღნიშნული, ფრენების გაუქმებას თურქეთის მხარე საქართველოსთან 14 მარტიდან გეგმავდა, თუმცა შეთანხმების თანახმად ვადა გახანგრძლივდა.

„თურქეთის რესპუბლიკამ ვირუსის გავრცელების საწინააღმდეგო ღონისძიებების ფარგლებში დააწესა მთელი რიგი შეზღუდვები, როგორც “თურქეთის ავიახაზების” საერთაშორისო ფრენებზე, ისე სახმელეთო საზღვარზე გადაადგილების მხრივ. მათ შორის, როგორც ცნობილია საქართველო და თურქეთი შეთანხმდნენ შეზღუდონ ფიზიკური პირების გადაადგილება სახმელეთო საზღვარზე სარფის საბაჟო-გამშვები პუნქტის გავლით. აღნიშნული შეზღუდვა არ ეხება ტვირთბრუნვას.

ამასთან ორ ქვეყანას შორის არსებული ინტენსიური ხალხთაშორისი და საქმიანი კავშირების გათვალისწინებით, მხარეები შეთანხმდნენ რომ ფიზიკური პირების გადაადგილებისთვის ფუნქციონირებას განაგრძობს ვალესა და კარწახის გადასასვლელი პუნქტები.

გასათვალისწინებელია, რომ თურქეთის რესპუბლიკამ ქვეყანაში კორონავირუსის გავრცელების წინააღმდეგ მიმართული ზომების ფარგლებში უკვე გააუქმა ავიამიმოსვლა მრავალი ქვეყნის მიმართულებით, მსგავსი გადაწყვეტილების მიღება მ.წ. 14 მარტიდან იგეგმებოდა საქართველოსთან დაკავშირებითაც. თუმცა ორივე მხარემ ერთობლივი შეთანხმებით მიიღო გადაწყვეტილება ფრენების გახანგრძლივების მიმდინარე წლის 20 მარტის 24:00 საათამდე.

ამასთან, დღეიდან, საქართველოს და აზერბაიჯანის მთავრობების მიერ მიღებული ერთობლივი გადაწყვეტილებით, ორ ქვეყანას შორის მიმოსვლა მხოლოდ ორი - ლაგოდეხისა და წითელი ხიდის სასაზღვრო-გამშვები პუნქტების მეშვეობით განხორციელდება. საქართველოს მთავრობის ადმინისტრაციის ინფორმაციით, უცვლელი რჩება 14 მარტიდან დროებით დაწესებული რეჟიმი, რომლის თანახმადაც, ორივე მხარე მხოლოდ სამშობლოში დაბრუნების სურვილის მქონე საკუთარი მოქალაქეების ქვეყანაში შეუფერხებელ შესვლას უზრუნველყოფს.

შეზღუდვები არ ვრცელდება სატვირთო გადაზიდვებზე.