აშშ-ში ცდიან მედიკამენტს, რომლითაც კორონავირუსით დაავადებული ერთი პაციენტი უკვე განიკურნა

აშშ-ში, ამერიკული ბიოტექნოლოგიური კომპანია Gilead Sciences-ის მეცნიერებმა შექმნეს ექსპერიმენტული პრეპარატი და ირწმუნებიან, რომ ახალი ტიპის კორონავირუსთან ბრძოლის კუთხით, იმედისმომცემი სურათი აქვთ.

შეგახსენებთ, "გილიადი" C ჰეპატიტის ელიმინაციის პროგრამაშია ჩართული და საქართველოს ვირუსის საწინააღმდეგო პრეპარატებით, 2015 წლიდან, უსასყიდლოდ ამარაგებს.

კორონავირუსის საწინააღმდეგო წამლის პირველი კლინიკური ვერსიის გამოცდა Covid-19-ით ინფიცირებულ პაციენტებზე უკვე მიმდინარეობს და როგორც სპეციალისტები აცხადებენ, მომდევნო თვეში, აპრილში, უკვე უნდა იყოს სურათი იმისა, თუ რამდენად წარმატებულია პრეპარატი.

Gilead Sciences-ში აცხადებენ, რომ წამლის მომზადების პროცესი დაჩქარებულ რეჟიმში წარიმართა და ახლაც მედიკოსები ყველაფერს აკეთებენ იმისთვის, რომ პრეპარატი სწრაფად გამოიცადოს.

კორონავირუსის გავრცელების პარალელურად, სხვადასხვა ფარმაკოლოგიურმა კომპანიებმა დამოუკიდებლად დაიწყეს ანტივირუსული პრეპარატის შექმნაზე მუშაობა და ჯამში 300-მდე სხვადასხვა მედიკამენტის კლინიკური ვერსია შეიქმნა, თუმცა მათ შორის Remdesivir-ს,ყველაზე იმედიანად უყურებენ და თვლიან, რომ ეს პრეპარატი კორონავირუსით დაინფიცირებული ადამიანების სამკურნალოდ ყველაზე ეფექტური იქნება.

"პოტენციურად ამ წამალს შეეძლება დაავადების გართულების შეჩერება, იმ ადამიანების გადარჩენა, რომლებიც უკვე ჰოსპიტალიზებულები არიან და შესაძლებელი იქნება მისი გამოყენება პროფილაქტიკის მიზნით", - ამბობს ჩრდილოეთ კაროლინის უნივერსიტეტის პროფესორი ტიმოთი შიჰანი, რომელიც ერთ-ერთია იმ მკვლევართაგან, რომლებიც მედიკამენტის ეფექტურობას სწავლობენ.

მისივე თქმით, პრეპარატის მასშტაბურად გამოყენება მთლიანად დაკავშირებულია კლინიკური ვერსიის წარმატებაზე.

სანამ საზოგადოება შედეგის მოლოდინშია ამერიკაში, ჩინეთსა და იტალიაში მედიკოსები უკვე იყენებენ აღნიშნულ პრეპარატს პაციენტების მცირე ჯგუფის სამკურნალოდ. წამალს სულ 394 ადამიანზე ცდიან.

პირველი ამერიკელი პაციენტი, 35 წლის ამერიკელი მამაკაცი ვაშინგტონიდან, გამოჯანმრთელდა ამ წამლის გამოყენების შედეგად, მაგრამ მეცნიერები ამბობენ, რომ ეს არ არის საკმარისი მედიკამენტის ეფექტურობაზე დამაჯერებლად სასაუბროდ და ამაში დასარწმუნებლად კვლევა უნდა დასრულდეს.

კოლუმბიის უნივერსიტეტის პროფესორი და ინფექციური დაავადებების სპეციალისტი დევიდ ჰოც ეთანხმება სხვა მეცნიერებს და ამბობს, რომ ყველაზე იმედისმომცემი კანდიდატი სხვა მედიკამენტების კლინიკურ ვერსიებს შორის, remdesivir-ია.

მეცნიერები მუშაობენ ვაქცინის შექმნაზეც, თუმცა ამას გაცილებით მეტი დრო სჭირდება. როგორც სპეციალისტები ამბობენ, Covid-19-ის საწინააღმდეგო ვაქცინის შესაქმნელად მინიმუმ 1 წელია საჭირო (წაიკითხეთ: როდის გამოიგონებენ კორონავირუსის საწინააღმდეგო ვაქცინას)

ბოლო ინფორმაციით, კორონავირუსით მსოფლიოში 119 246 დაინფიცირდა, მათგან 4 300 გარდაიცვალა, ხოლო 66 581 პაციენტი გამოჯანმრთელდა.