"შიდა გადაცემის 4-5 შემთხვევა დაკავშირებულია "გეფას" თანამშრომელთან... ახალი პაციენტიდან შიდა გადაცემა ერთია, ის ვინც ხელოსანი იყო" - ცერცვაძე

ინფექციური საავადმყოფოს გენერალური დირექტორის, თენგის ცერცვაძის განცხადებით, კორონავირუსით ინფიცირებული 8 ახალი შემთხვევიდან ერთი დაფიქსირებულია, როგორც შიდა გადაცემა.

ცერცვაძის თქმით, შიდა გადაცემის კიდევ 4-5 შემთხვევაა დაფიქსირებული, რომელიც "გეფას" თანამშრომელს უკავშირდება.

"შიდა გადაცემის 4-5 შემთხვევა დაფიქსირდა, რომელიც დაკავშირებულია "გეფას" თანამშრომელთან. ამ 8 ახალი პაციენტიდან, მე როგორც ვიცი შიდა გადაცემა ერთი არის, ის ვინც ხელოსანი იყო. 5 პაციენტი ნამდვილად არ არის და ბოლო 2-ის არაფერი ვიცი, რადგან გადაცემაში ვიჯექი, როდესაც მოვისმინე, რომ კიდევ ორი დაემატა", - განაცხადა თენგის ცერცვაძემ.

ცნობისთვის, საქართველოში კორონავირუსის შემთხვევები 23-მდე გაიზარდა. stopcov.gov.ge-ზე გამოქვეყნებული ინფორმაციის თანახმად, კარანტინის რეჟიმში - 126 იმყოფება, ხოლო სტაციონარში მეთვალყურეობის ქვეშ - 46.