რატომ შეხვდა ვანო ჩხარტიშვილი ამირან გამყრელიძეს - "ტვ პირველის" ინფორმაციით, მას სავარაუდოდ ჯანდაცვის მინისტრად ამზადებენ
ტელეკომპანია "ტვ პირველმა" გაავრცელა ფოტო, რომელზეც ჩანს როგორ ხვდება ბიზნესმენი ვანო ჩხარტიშვილი დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელს ამირან გამყრელიძეს. ამ "საიდუმლო შეხვედრამ" გააჩინა ეჭვები, რომ გამყრელიძე შესაძლოა, ჯანდაცვის მინისტრის პოზიციაზე მოიაზრებოდეს.
"მმართველი პარტიის კულუარებიდან ვრცელდება ინფორმაცია, რომ ამირან გამყრელიძის შანსები გახდეს ჯანდაცვის უწყების პირველი პირი, მოქმედი მინისტრის ეკატერინე ტიკარაძის გადაწყვეტილებებით გამოწვეული უკმაყოფილების ფონზე, სულ უფრო რეალური ხდება.
ჭირდება თუ არა წინასაარჩევნოდ, საზოგადოების კეთილგანწყობის გათვალისწინებით, ბიძინა ივანიშვილსა და ქართულ ოცნებას 4-მილიარდიანი უწყების ხელმძღვანელად ამირან გამყრელიძე?
რა გეგმა აქვს მასთან დაკავშირებით ჩხარტიშვილს, რომელზეც სულ უფრო ხშირად ამბობენ, რომ ივანიშვილის "კადრების სამჭედლო" აქვს ჩაბარებული? იქნება თუ არა გამყრელიძის მთავარი რეკომენდატორი ბიძინა ივანიშვილთან ვანო ჩხარტიშვილი?" - აღნიშნავს "ტვ პირველის" წამყვანი საკადრო ტექსტში.
ტელეკომპანიის ინფორმაციით, ისინი ბიზნესმენს დაუკავშირდნენ და მისგან წერილობითი პასუხი მიიღეს ამ საკითხზე:
"რა შუაშია მთავრობის ცვლილება? მეგობარს შევხვდი სამედიცინო საკითხებზე. მე რატომ უნდა შევხვდე ცვლილებებზე საერთოდ, რა ჩემი საქმეა? ეს პროვოკაციული თემაა" - უპასუხა "ტვ პირველს" ვანო ჩხარტიშვილმა.
შეგახსენებთ, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის ამჟამინდელმა მინისტრმა ეკატერინე ტიკარაძემ 2019 წლის ივნისში ჩაანაცვლა წინამორბედი დავით სერგეენკო, რომელიც ყველაზე დიდხანს იკავებდა "ოცნების" მთავრობაში მინისტრის პოსტს.
ტიკარაძე მინისტრობამდე საჩხერის საავადმყოფოს დირექტორი იყო.
"კომპანიებთან, რომლებისგანაც საქართველომ კორონავირუსის სამკურნალო პრეპარატი უნდა მიიღოს, მუშაობა დაწყებულია" - სოზარ სუბარი
LIVE: ამირან გამყრელიძე "360 გრადუსში"
