"უკვე 32 საათია არაფერი ვიცით მის შესახებ..." - ქუთაისში დაკარგულ ტურისტს ეძებენ

ქუთაისში გაუჩინარებულ ტურისტს ეძებენ. ნიდერლანდებიდან ჩამოსული ახალგაზრდა მამაკაცი 7 მარტს გაუჩინარდა. ინფორმაციას ახალგაზრდა მამაკაცის ძმა სოციალურ ქსელში ავრცელებს და დახმარებას ითხოვს. როგორც ის წერს, მეგობრები კაფეში ერთად იყვნენ, შემდეგ ქუჩაში გავიდნენ, რის შემდეგაც მისი ძმა გაუჩინარდა. დაკარგული სახელად სიემ ვიგერია, ძმის თქმით, ის საკმაოდ ნასვამი იყო და იმ ღამით არც სასტუმროში დაბრუნებულა და არც ტელეფონს პასუხობს.

დაკარგული ბიჭის მეგობარი დღეს ჟურნალისტებთან აცხადებს, რომ მათ უკვე მიმართეს სამართალდამცველებს.

"რესტორან "ბარაქაში" ვსადილობდით, ნასვამები ვიყავით. შემდეგ ის წავიდა და არ ვიცი სად, მე „მაკდონალდში“ მივედი, შემდეგ სასტუმროში დავბრუნდი და დილის 7 საათამდე ველოდებოდი მის დაბრუნებას, თუმცა არ მოვიდა. გუშინ პოლიციას შევატყობინე და ახლა ყველა ეძებს.

უკვე 32 საათია არაფერი ვიცით დაკარგულის შესახებ. დღეს პოლიციაში მივდივარ და კამერების ჩანაწერები უნდა ვნახოთ. სოციალურ ქსელში წერდნენ, რომ ღამის პირველ საათზე ნასვამი ნახეს, რუსთაველის ქუჩაზე. არ ვიცი როგორ დაიკარგა. დღეს მისი და ჩემი მშობლებიც ჩამოდიან საქართველოში. იმედია, მალე ვიპოვნით"-აცხადებს დაკარგულის მეგობარი.

ახალგაზრდები საქართველოში აზერბაიჯანის გავლით შემოვიდნენ და სხვა ქვეყანაში აპირებდნენ წასვლას. შინაგან საქმეთა სამინისტროს ინფორმაციით, მომხდართან დაკავშირებით მათთან შეტყობინება გუშინ შევიდა და მისი ადგილსამყოფელის დასადგენად დაწყებულია საგამოძიებო ღონისძიებები.

თუ ვინმემ სადმე შეამჩნიეთ, ან გაქვთ რაიმე ინფორმაცია, გთხოვთ დაუკავშირდეთ დაკარგულის ძმას ნომრებზე: +31 64 75 45 017 ან +31 63 93 42 600.