"საქართველოში კეთილი ადამიანები არიან... არ მინდა ირანში დაბრუნება" - რა ვიდეოს აქვეყნებს მამაკაცი, რომელიც კორონავირუსმა ვარსკვლავად აქცია

კორონავირუსმა საქართველოს ახალი "ვარსკვლავი" შესძინა. ვიდეო, სადაც ჩანს, თუ როგორ აბრუნებს ინფექციური საავადმყოფოს წარმომადგენელი ირანელ პაციენტს კლინიკაში, ინტერნეტჰიტად იქცა. ვიდეო "ფეისბუქის" მხოლოდ ქართველ მომხმარებლებში არ ყოფილა პოპულარული. ის უცხოურმა გამოცემებმაც აიტაცეს. მათ შორის, Daily Mail-მა, რომელმაც მომხდარს ვრცელი სტატია მიუძღვნა.

ამბავი კი ასეთი იყო - ირანელი მამაკაცი ვირუსის სიმპტომებით თბილისის ინფექციურ საავადმყოფოში შეიყვანეს. ხოლო როდესაც უკვე ეგონა, რომ გაწერეს, ჟურნალისტებს ინტერვიუს აძლევდა და ამბობდა, რომ კორონავირუსი არ დაუდასტურდა, რომ სრულიად ჯანმრთელია, რა დროსაც, უკან შეაბრუნეს, ხოლო კლინიკის ერთ-ერთმა წარმომადგენელმა ასეთი ფრაზა თქვა - "ვერაა კარგად ეს"(ნახეთ ვიდეო).

მომხდარის შემდეგ მამაკაცი აბასთუმანში, საკარანტინო ზონაში გადაიყვანეს, საიდანაც ის ფოტოებს აქვეყნებს, ასევე "ლაივ" ვიდეოების საშუალებით საზოგადოებას თავისი ჯანმრთელობის მდგომარეობის შესახებ უყვება.

"მე არ მაქვს კორონა, მაგრამ 15 დღე აქ უნდა ვიყო. პრობლემა არ მაქვს. საქართველოში კეთილი ადამიანები არიან. მე არ მინდა ჩემს ქვეყანაში, ირანში დაბრუნება, რადგანაც იქ ადამიანებს კორონავირუსი აქვთ, მაგრამ მე არ მაქვს კორონა", - ამბობს ვიდეოში შაჰაბი.

ირანში კორონავირუსით ინფიცირებულთა რაოდენობა დღითიდღე იზრდება და ხელისუფლება ჯერჯერობით ვერ ახერხებს მასთან ეფექტურად ბრძოლას. ოფიციალური ინფორმაციით, ვირუსით ირანში 50 ადამიანია გარდაცვლილი, თუმცა როგორც სხვადასხვა ავტორიტეტული გამოცემები, მათ შორის, BBC წერენ, გარდაცვლილთა რაოდენობა გაცილებით მეტია. BBC წყაროზე დაყრდნობით წერს, რომ ირანში კორონავირუსმა 200-ზე მეტი ადამიანი იმსხვერპლა.