"თბილისში ჩემს პროფესიას სამსახური ვერ შევუთავსე და უკან დავბრუნდი" - როგორ გახდა ყაზბეგის 13 აღსაზრდელიანი ბაგა-ბაღი ინტერნეტში პოპულარული
სოფელი ყანობი ყაზბეგის მუნიციპალიტეტში ერთ-ერთი ისტორიული სოფელია, რომელიც წყაროებში ჯერ კიდევ XIV საუკუნიდან მოიხსენიება... მთაზე ლამაზად შეფენილი სოფელი მუნიციპალიტეტის ტერიტორიაზე შესულს შეუმჩნეველი არ რჩება...ზამთარს იქ 30 კომლამდე ატარებს, ზაფხულში, ადამიანთა რაოდენობა იმატებს.
როგორც ადგილობრივი მოსახელობა ამბობს, მათთან შობადობამ იმატა და სოფელში ხუთშვილიანი ოჯახებიცაა. პატარების სიმრავლემ კი იქ ბაღის გახსნის აუცილებლობა გააჩინა და 2019 წლის 11 თებერალს გაიხსნა კიდეც.
ამ ბაღის აღსაზრდელები სოციალურ ქსელში მათი ამა თუ იმ აქტივობით არაერთხელ მოხვედრილან და ყოველთვის უამრავი ადამიანის მოწონებას იმსახურებენ. მედიითაც უკვე კარგად იცნობენ მათ. პედაგოგები სკოლამდელი ასაკის 13 აღსაზრდელთან საოცარ აქტივობებს ატარებენ. მათი კრეატიული ღონისძიებების ვიდეოები კი ელვისებურად ვრცელდება. ცოტა ხნის წინ ასე გადააზიარეს გვერდებზე პატარების მიერ არაჟნის კოლოფებსა და მუყაოს საკრავებზე დაკრული ჯანსუღ კახიძის "მარში".
ბაღის დირექტორი ლალი ფიცხელაური AMBEBI.GE-სთან საუბარს ასე იწყებს:
- ეს ბაღი პირველად შარშან გაიხსნა, ყანობში ბაღი არასდროს ყოფილა... მოკლედ, აქ სამსახური შემომთავაზეს და ვარ ამ ბაღის დირექტორი. მყავს 13 აღსაზრდელი. შობადობა მაღალია სოფელში და ამან სკოლამდელი აღზრდის დაწესებულების აუცილებლობა მოითხოვა. მუნიციპალიტეტს მოსახლეობამ თხოვნით მიმართა და მოთხოვნა დაკმაყოფილდა. გახსნის დღიდან მუნიციპალიტეტი და ბაღების გაერთიანება გვერდში გვიდგას.
- 13 აღსაზრდელიდან ყველა ადგილობრივია?
- კი და ახლახანს გვერდით სოფლიდან, ხურთისიდან ერთი მოსწავლე შემოგვემატა. ის ჩვენი აღმზრდელ-პედაგოგის თამარ ხუციშვილის შვილია. მანამდე კი თამარმა სამსახურის მოთხოვნაზე განაცხადი შემოიტანა. ფილოლოგია და მუშაობა შერეულ ჯგუფში დაიწყო. ბაღში ბავშვებს 2 წლიდან ვიღებთ.
- თქვენი მასწავლებლის მიერ ბავშვებთან მომზადებულმა მუსიკალურმა ნომერმა ინტერნეტსივრცე მოიცვა...
- კი და არა მარტო ამ მუსიკალურმა ნომერმა. ენერგიას, შესაძლებლობებს მართლა არ ვზოგავთ. სულ იმის მცდელობაში ვართ, რომ ჩვენს გუნდს მუდმივად რაიმე ახალი აქტივობა გვქონდეს. არაჩვეულებრივი მისალმებაც გვქონდა - სექტემბერი სწორედ ამით დავიწყეთ. გვქონდა ასევე აქტივობა, როცა შინაური ცხოველები მოვიყვანეთ - თხა, ლეკვი, ბატკანი, ფისო და პატარებმა ეს შინაური ცხოველები საერთოდ პირველად ნახეს. ამანაც დიდი აჟიოტაჟი გამოიწვია.
- რაც შეხება მუსიკალურ ნომერს, ამის იდეა როგორ გაჩნდა?
- კრეატიულ აქტივობებს ხშირად ვაკეთებთ. პედაგოგს, ნანა ნოზაძეს, მუსიკის მასწავლებელს ვთხოვე, იქნებ რაიმე მორიგი აქტივობა გავაკეთოთ-მეთქი და მანაც შემომთავაზა. ნანა სამცხე-ჯავახეთიდანაა, ხევშია გამოთხოვილი, აქაური რძალია, თავის საქმის პროფესიონალია, თავს არ ზოგავს და მისი იდეა იყო, ბავშვებს ჯანსუღ კახიძის "მარში" შეესრულებინათ. მივხვდი, რომ სერიოზული და არასახუმარო იდეა იყო - ბავშვებს არაჟნის კოლოფებზე და მუყაოსგან დამზადებულ საკრავებზე უნდა დაეკრათ. მოკლედ, მათი შესრულება მე გადავიღე, რეპეტიციაზეც არ დავსწრებივარ. გადაღებისას საოცარი ემოცია მქონდა - მინდოდა, მეთქვა, ბრავო! ყოჩაღ! მაგრამ რომ ვიღებდი, თავის შეკავება მომიხდა.
პატარები უკრავდნენ არაჟნის ქილებზე, მისი სახურავებით, ხის ჯოხებით, ბოთლებში ჩაყრილი ლობიოთი და ბრინჯით, მუყაოსგან გამოჭრილ ვიოლინოზე, ბურთზე, პარლელურად კი ფონოგრამა ჟღერდა. პატარებმაც ისიამოვნეს, ჩვენც და შესაბამისად, სოციალური ქსელის მომხმარებლებმაც. ეს ორკესტრი შედგება 2 წლიდან 5 წლამდე ბავშვებისგან, რადგანაც მასში გაერთიანებულია ორი ჯგუფი - ბაგა და ბაღის ასაკის პატარები.
ასევე კარგი შემეცნებითი აქტივობები გვაქვს დაგეგმილი. მინდა, მაგალითად, თამაშ-თამაშით ვისწავლოთ ანბანი, ციფრები მათემატიკაში, შეკრება-გამოკლება თუნდაც 5-ის ფარგლებში. გვინდა, ამ საქმეში გარკვეული ფორმით მშობლებიც ჩავრთოთ...
შარშან შემოდგომის ზეიმი ღია ცის ქვეშ მოვაწყეთ - თივის აღების დრო იყო და ამ ვიდეომაც უამრავი ნახვა მოაგროვა. მიგვიწვიეს რუსთაველის თეატრშიც, იმ ღონისძიებაშიც ბავშვებთან ერთად, ნანა მასწავლებელიც მონაწილეობს, რაჭულს ერთად ცეკვავენ. თოვლის ბაბუაც ის იყო, შესაბამისად გახლდათ შემოსილი, რომელიც მოვიტაცეთ და ბავშვებმა იხსნეს ლექსით, სიმღერით და ცეკვით.
- სტეფანწმინდელი ხართ?
- სტეფანწმინდაში ვცხოვრობდი სკოლის დამთავრებამდე, შემდეგ სულხან-საბა ორბელიანის სახელობის პედაგოგიურ უნივერსიტეტში ჩავაბარე. როდესაც დავამთავრე, ყანობში დავბრუნდი, ყაზბეგში 2 წელი წმინდა ილია მართლის სახელობის გიმნაზიაში, საქმეთა მმართველად ვიმუშავე და შემდეგ დავოჯახდი, საცხოვრებლად თბილისში გადმოვედით, 10 წელი ვცხოვრობდით. 2 შვილი მყავს, მაგრამ რადგან თბილისში ჩემს ოჯახურ მდგომარეობას ვერანაირი სამსახური ვერ შევუთავსე, ისევ ყაზბეგში დავბრუნდით. დაბრუნება იმანაც გამოიწვია, რომ ჩემი მეუღლე სასაზღვროში, დარიალში მუშაობს.
- ანუ ყაზბეგში უფრო კომფორტულია თქვენთვის ცხოვრება?
- დიახ, სამსახურის გარდა ასევე მნიშვნელოვანია, ჩემი შვილების ჯანსაღ გარემოში გაზრდა.
პაატა იმნაძე - ჩვენ ვამბობთ, რომ ერთი კოვზი არ გამოიყენო და ახლა, მე ხომ არ შემიძლია შევცვალო რელიგიური რიტუალები?
შვიდი წლის ბავშვს, რომელიც ქუთაისის ინფექციურ საავადმყოფოში მკურნალობდა, კორონავირუსი არ დაუდასტურდა
