აშშ-ს მოწინავე სამხედრო სასწავლებლების კადეტები უსაფრთხოების მიმართულებით სწავლებას საქართველოში,  BTU-ში გაივლიან

ამერიკის ელიტარული სამხედრო კოლეჯის, ციტადელის (Citadel Military College) და ჯორჯიის სამხედრო უნივერსიტეტის (University of North Georgia) კადეტები, უსაფრთხოების მიმართულებით 3 კვირიან გადამზადებას საქართველოში, ბიზნესისა და ტექნოლოგიების უნივერსიტეტში გაილიან. ეს უკვე მეორე შემთხვევაა, როდესაც ამერიკელი კადეტები გადამზადებისთვის რეგიონს სტუმრობენ და სტრატეგიულ პარტნიორად BTU-ს ირჩევენ.

კადეტების გადამზადების პირველი ეტაპი 2019 წელს ჩატარდა საქართველოში. ბიზნესისა და ტექნოლოგიების უნივერსიტეტში მიმდინარე პროგრამამ საერთაშორისო ექსპერტების მაღალი შეფასება დაიმსახურა. შედეგად, კადეტთა გაზრდილი შემადგენლობა, საქართველოს 2020 წელსაც ეწვევა.

"უნივერსიტეტის ინოვაციური პროგრამები და საერთაშორისო სტანდარტების შესაბამისი გადამზადების პროგრამა, ძლიერი ტექნოლოგიური ბაზა და სილიკონ ველი თბილისის გარშემო შექმნილი ეკოსისტემა - ეს ის მძლავრი მიმართულებებია, რის გამოც, ციტადელმა და ჯორჯიის უნივერსიტეტმა არჩევანი ბიზნესისა და ტექნოლოგიების უნივერსიტეტზე გააკეთა,’’ - აცხადებს აშშ-ს მხარე. აღსანიშნავია, რომ გადამზადების 3 კვირიანი კურსის ფარგლებში სამხედრო კადეტები ბიზნესისა და ტექნოლოგიების უნივერსიტეტის და საქართველოს ატლანტიკური საბჭოს მიერ ერთობლივად მომზადებულ პროგრამას გაივლიან.

Citadel აშშ-ს ელიტარული სამხედრო კოლეჯია, რომელიც სამხრეთ კაროლინაში მდებარეობს. კოლეჯი 1842 წელს გაიხსნა. “ფორბსის” სარეიტინგო სისტემების მიხედვით ციტადელის სამხედრო კოლეჯი გახსნის დღიდან ლიდერებს შორისაა სამხედრო სწავლების მიმართულებით. კოლეჯის კურსდამთავრებულებით დაკომპლექტებულია მსოფლიოს მრავალი ქვეყნის შეიარაღებული ძალები, მთავრობები და მსხვილი საერთაშორისო ორგანიზაციები.

ჯორჯიის უნივერსიტეტი არის ჯორჯიის საუნივერსიტეტო სისტემის ნაწილი და არის სახელმწიფო ლიდერების უნივერსიტეტი. ჯორჯიის უნივერსიტეტი niche-ს სარეიტინგო სისტემების მიხედვით მოწინავე ადგილს იკავებს სახელმწიფო უნივერსიტეტებს შორის. უნივერსიტეტს 20 000-მდე სტუდენტი ჰყავს და არის შტატების ერთ-ერთი ყველაზე დიდი სახელმწიფო უნივერსიტეტი.

ციტადელის სამხედრო კოლეჯისა და ჯორჯიის უნივერსიტეტის კადეტები BTU-ს 2020 წლის ზაფხულში ეწვევიან.