იტალიაში კორონავირუსით 4 ბავშვი დაინფიცირდა

ევროპის ქვეყნებს შორის იტალიაში კორონავირუსის ყველაზე მეტი შემთხვევა ფიქსირდება. BBC-ის ინფორმაციით, ვირუსი გამოვლინდა ბავშვებშიც. კონკრეტულად კი, ის უკვე 4 ბავშვს დაუდასტურდა.

ბოლო მონაცემებით იტალიაში კორონავირუსით 12 ადამიანია გარდაცვლილი. ყველა მათგანი ხანში შესული იყო და ჯანმრთელობის სხვა პრობლემები უფიქსირდებოდა. ინფიცირების შემთხვევები ძირითადად იტალიის ჩრდილოეთ რეგიონებში ვლინდება.

"როიტერსის" ინფორმაციით, იტალიაში კორონავირუსის 100 ახალი შემთხვევა გამოვლინდა და დაინფიცირებულთა საერთო რაოდენობამ 400-ს გადააჭარბა.

ხელისუფლების გადაწყვეტილებით, ლომბარდიისა და ვენეტოს რეგიონებში დახურულია საბავშვო ბაღები, სკოლები, უნივერსიტეტები, კინოთეატრები და საზოგადოებრივი თავშეყრის სხვა ადგილები.

კარანტინში რჩება აღნიშნული რეგიონების 11 ქალაქის 55 000-მდე მცხოვრები.

კორონავირუსის შემთხვევები მსოფლიოს მასშტაბით 35-ზე მეტ ქვეყანაში ფიქსირდება. ვირუსის პირველი შემთხვევა დადასტურდა საქართველოშიც. კორონავირუსი აღმოაჩნდა საქართველოს მოქალაქეს, რომელიც ქვეყანაში ირანიდან აზერბაიჯანის გავლით შემოვიდა. ის ინფექციურ საავადმყოფოშია მოთავსებული.

ბოლო მონაცემებით, გლობალური მასშტაბით, 82 164 ადამიანია ინფიცირებული, 2 801 გარდაცვლილი, ხოლო 32 897 პაციენტი გამოჯანმრთელებულია.