შეხლა-შემოხლა პარლამენტის შესასვლელთან და აქტივისტების პერფორმანსი - რას გეგმავს ხვალ ოპოზიცია

პარლამენტთან სამოქალაქო აქტივისტებსა და დაცვის სამსახურის თანამშრომლებს შორის დაპირისპირება იყო.

შეხლა-შემოხლა მას შემდეგ დაიწყო, რაც ერთმა აქტივისტმა პარლამენტში შესასვლელი კარისკენ გაიწია და შესვლა სცადა. „ბიძინას ბოსტანია თუ ზოოპარკია, განმარტეთ მაინც რატომ არ გვიშვებთ“, - მიმართეს აქტივისტებმა დაცვის სამსახურის თანამშრომლებს.

მას შემდეგ, რაც სამოქალაქო აქტივისტები პარლამენტში არ შეუშვეს, აქციის მონაწილეებმა საკანონომდებლო ორგანოს უკანა შესასვლელთან ბოტასები კედელზე მიამაგრეს. როგორც აქციის მონაწილეებმა განაცხადეს, „ეს ბოტასები რეჟიმის სიმბოლოა“.

შეგახსენებთ, რომ დღეს პარლამენტში გენერალური პროკურორობის კანდიდატ ირაკლი შოთაძეს მოუსმენენ.

აღნიშნულთან დაკავშირებით, სამოქალაქო აქტივისტები პარლამენტში შესვლას ითხოვენ. როგორც ისინი აცხადებენ, მათ სახელებზე საშვებია დაშვებული, სამართალდამცველები კი შენობაში შესვლის საშუალებას არ აძლევენ.

„ახალი საქართველოს“ თავმჯდომარის, გიორგი ვაშაძის განცხადებით, ხვალ, 18 თებერვალს ოპოზიცია პარლამენტთან პლენარულ სხდომაზე ირაკლი შოთაძის მოსმენის პარალელურად, საპროტესტო აქციას გამართავს.

როგორც ვაშაძემ „პალიტრანიუსის“ გადაცემა „ნიუსრუმში“ განაცხადა, აქცია დილით 10 საათზე დაიწყება.

„ჩვენ ხვალ გვექნება მშვიდობიანი საპროტესტო ღონისძიება პარლამენტის მიმდებარე ტერიტორიაზე, რომელიც 10 საათზე დაიწყება. ეს არის გარკვეულწილად გამაფრთხილებელი აქციები. ჩვენ პირობა დავდეთ, რომ ვერცერთ ასეთ მნიშვნელოვან საკითხს „ქართული ოცნება“ მშვიდად და აუღელვებლად ვერ ჩაატარებს. საზოგადოებას უნდა შევახსენოთ, რომ შოთაძე ჩვეულებრივი მსახურია „ოცნების“ იმ რეჟიმის, რომელიც ჩამოყალიბდა ქვეყანაში და მას უკან აბრუნებენ ერთადერთი რამის გამო - ის არის ერთგული პირადად ივანიშვილის, ის არის ერთგული „ქართული ოცნების“ ლიდერების და ყველა დაკვეთის და დავალების შესრულება შეუძლია. თუ ჩვენ გვიყვარს ჩვენი ქვეყანა, თუ ჩვენ ვფიქრობთ, რომ არ მიდის სწორად ეს პროცესი, უნდა მივიდეთ აქციაზე, მშვიდობიანი პროტესტი ეს არის კონსტიტუციით გარანტირებული უფლება, რომელიც ჩვენ გვაქვს”, - განაცხადა ვაშაძემ.

მისივე თქმით, როცა „ქართული ოცნება“ ოქტომბერში არჩევნებს წააგებს, შოთაძეს განცხადების დაწერა და სამსახურიდან წასვლა მოუწევს.

„შოთაძე იქნებოდა თუ ნებესმიერი სხვა, ამას დიდი მნიშვნელობა არ აქვს. ოქტომბერში არჩევნებში „ქართული ოცნების“ დამარცხების შემდეგ ყველა ეს ადამიანი, რა თქმა უნდა, თვითონ დაწერს განცხადებას და წავა სამსახურიდან. ერთხელ უკვე გადადგა შოთაძე, არც მეორე ვადა ექნება ხანგრძლივი”, - აღნიშნა ვაშაძემ.