მეგობრის მკვლელობაში ბრალდებულ ბექა კვიციანს ახალი ბრალი პოლიციელებზე თავდასხმისთვის წარედგინა

მეგობრის მკვლელობაში ბრალდებული ბექა კვიციანის ადვოკატის, მუხრან ღურწკაიას განცხადებით, პენიტენციურ დაწესებულებაში მას კვიციანი არ შეხვდა. აღნიშნულთან დაკავშირებით ღურწკაიამ სასამართლო პროცესზე განაცხადა.

როგორც ადვოკატი განმარტავს, ბექა კვიციანი არცერთ სასამართლო სხდომაზე არ გამოცხადდება, თუმცა, არა იმის გამო, რომ თავს არიდებს, არამედ იმის გამო, რომ მას ეს დანაშაული არ ჩაუდენია.

„მასთან პენიტეცნიურ დაწესებულებაში გუშინ ვიყავი და არ შემხვდა. ბადრაგებს დააბარა, მან იცის ჩემი პოზიცია და გააგრძელოს საქმეო", - განაცხადა ღურწკაიამ.

დღევანდელ სასამართლო პროცესზე ბრალდებულ ბექა კვიციანს პოზიცია უნდა დაეფიქსირებინა, სურს თუ არა, რომ მისი საქმე ნაფიც მსაჯულთა სასამართლომ განიხილოს. ვინაიდან ის არცერთ სხდომას არ დაესწრება, სასამართლო კვიციანს წერილობითი ფორმით გაუგზავნის ნაფიც მსაჯულთა დებულების შინაარსს, რის შემდეგაც მან აღნიშნულთან დაკავშირებით, პოზიცია უნდა დააფიქსიროს.

ამასთან, დღევანდელ სასამართლო პროცესზე საქმის პროკურორმა გრიგოლ ბიბილაშვილმა ბექა კვიციანის მიმართ მკაცრი აღკვეთის ღონისძიების პატიმრობის ძალაში დატოვების შუამდგომლობა დააყენა. როგორც პროკურორმა განმარტა, გარდა მკვლელობის ბრალდებისა, ბექა კვიციანს დამატებით სხვა ბრალიც წარედგინა, კერძოდ კი, დროებითი მოთავსების იზოლატორში პოლიციელებზე თავდასხმისთვის.

ბიბილაშვილის განცხადებითვე, ბრალდებული დანაშაულებრივი ქმედებებისკენაა მიდრეკილი და გასათვალისწინებელია მისი უაღრესად აგრესიული და დაუნდობელი ხასიათი, ასევე ის ფაქტი, რომ ბექა კვიციანი მძიმე დანაშაულების ჩადენისთვის წარსულში არაერთხელაა ნასამართლევი.

ცნობისთვის, თბილისის ზღვის ტერიტორიაზე ახალგაზრდა მამაკაცის მკვლელობის ბრალდებით მისი მეგობარი, დეპუტატ ემზარ კვიციანის ძმიშვილი, ბექა კვიციანი რამდენიმედღიანი ძებნის შემდეგ დააკავეს.

მას ბრალი განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ფაქტზე საქართველოს სსკ-ის 108-ე მუხლით, ასევე, 236-ე მუხლის მე-3 და მე-4 ნაწილებით აქვს წარდგენილი.