მსოფლიო მოსახლეობის ორ-მესამედს კორონავირუსით ინფიცირება ემუქრება? - რას ვარაუდობს ჯანმო-ს მრჩეველი

მსოფლიოს მოსახლეობის ორი-მესამედი შესაძლოა კოროვირუსით COVID-19 დაინფიცირდეს.

ამის შესახებ Bloomberg-ი წერს, ჯანდაცვის მსოფლიო ორგანიზაციის მრჩევლის, ვირუსოლოგ ირა ლონჯინის განცხადების საფუძველზე. ლონჯინი ახორციელებდა კვლევებს, თუ როგორ ვრცელდება ჩინეთში ინფექცია.

ფლორიდის უნივერსიტეტის პროფესორის თქმით, შესაძლებელია ვირუსის გავრცელების შენელება კარანტინებით, თუმცა ვიდრე ჩინეთის მთავრობა აღნიშნულ ზომებს მიმართავდა, ვირუსი სხვა ქვეყნებში გავრცელდა.

ლონგინის თქმით, მისი შეხედულები ემყარება მონაცემებს, რომელიც აჩვენებს, რომ ვირუსით ინფიცირებული ყველა ადამიანი ინფექციას გადასცემს ორ ან სამ ადამიანს.

მისივე თქმით, კორონავირუსის გავრცელებისთვის თვალყურის დევნება რთულია იმის გამო, რომ დაავადების სწრაფი იდენტიფიცირება ვერ ხერხდება და ის გამოვლენამდე უკვე გადამდებია.

ჯანმრთელობის მსოფლიო ორგანიზაციის 23 თებერვლის ანგარიშის მიხედვით, გლობალურად დადასტურებულია ახალი კორონავირუსის, ანუ COVID-19-ის 78 811 შემთხვევა.

მათი უმრავლესობა - 77 042 შემთხვევა დაფიქსირებულია ჩინეთში, ჩინეთის გარეთ კი 1 769 შემთხვევა დაფიქსირდა 28 ქვეყანაში.

ამ ეტაპზე, სიკვდილის 2 462 შემთხვევაა აღრიცხული.