ჩინეთში, კორონავირუსით გარდაცვლილთა რაოდენობამ 100-ს გადააჭარბა - საქართველოს ხელისუფლება უხანიდან საკუთარი მოქალაქეების ევაკუაციის გეგმაზე მუშაობს

ჩინეთში, კორონავირუსით გარდაცვლილთა რაოდენობა 106-მდე გაიზარდა, - ამის შესახებ „როიტერსი“ იუწყება.

• მსოფლიოს მოწინავე ქვეყნებმა ჩინეთიდან საკუთარი მოქალაქეების გაყვანა დაიწყეს - რაზე საუბრობენ ბრიტანელი მკვლევარები და რას აცხადებს საქართველოს ელჩი

სააგენტოს ცნობით, ჰუბეის პროვინციის ჯანდაცვის კომისიამ ონლაინ განცხადება გაავრცელა, სადაც აღნიშნულია, რომ პროვინციაში ვირუსით გარდაცვლილთა რაოდენობამ 100-ს მიაღწია, დაინფიცირებულთა რიცხვი კი 2,714-ია.

რაც შეეხება, მთელი ქვეყნის მასშტაბით ვირუსით დაინფიცირების შემთხვევებს, ჩინური მედიის ინფორმაციით, ამ დროისთვის 4, 515 დადასტურებული შემთხვევაა დაფიქსირებული.

გუშინ, აშშ-მ და კანადამ საკუთარ მოქალაქეებს ჩინეთში გამგზავრებისგან თავის შეკავებისკენ მოუწოდეს.

საქართველოს პარლამენტის ჯანდაცვის კომიტეტის თავმჯდომარის, დიმიტრი ხუნდაძის ინფორმაციით, ხელისუფლება ჩინეთიდან, ქალაქ უხანიდან, სადაც კორონავირუსის ეპიცენტრია, საქართველოს მოქალაქეების ევაკუაციის გეგმაზე მუშაობს. ამის შესახებ ხუნდაძემ „ინტერპრესნიუსს“ განუცხადა.

მისივე თქმით, ჯერჯერობით საქართველოს მოქალაქეებისგან ხელისუფლებას ქალაქ უხანიდან გამოსვლასთან დაკავშირებით, თანხმობა მიღებული არ აქვს.

როგორც ხუნდაძემ აღნიშნა, ხელისუფლების გეგმაა, საქართველოს მოქალაქეები, რომელთა თანხმობაც ექნებათ, ეპიცენტრიდან გამოიყვანონ და საინკუბაციო პერიოდის გასვლის შემდეგ, საქართველოში ჩამოიყვანონ.

„ამასთან დაკავშირებით მიდის მუშაობა. მქონდა კომუნიკაცია შესაბამის უწყებებთან. საკარანტინო რეჟიმი მუშაობს და არ არის მარტივად რომ ბილეთი ავუღოთ და წამოვიყვანოთ. ჩემი მიდგომა, როგორც კომიტეტის თავმჯდომარის ასეთია და რეკომენდაციებიც მაქვს გაცემული - მინიმუმ უნდა მოვახდინოთ მათი გაყვანა ეპიცენტრიდან, თუნდაც ჩინეთის ან მეზობელი ქვეყნის არეალში. თუ მოვახერხეთ აქ ჩამოყვანა, მათთანვე შეთანხმებით, ეს იქნება ყველაზე კარგი გადაწყვეტილება. ამასთან დაკავშირებით ჩვენ ვმუშაობთ. რა თქმა უნდა, უნდა გავითვალისწინოთ საკარანტინო რეჟიმი და საინკუბაციო პერიოდი, ასევე უნდა გავითვალისწინოთ ჯანდაცვის მსოფლიო ორგანიზაციის რეკომენდაციები. ამ ერთობლიობაში უნდა მივიღოთ გადაწყვეტილება. უნდა გავითვალისწინოთ, რომ საინკუბაციო პერიოდი ამოიწუროს და შემდეგ გამოვიყვანოთ ქვეყნიდან, მაგრამ პირველ ეტაპზე, უმჯობესი იქნება, თუკი ამის ორგანიზება მოხდება რომ ეპიცენტრს მოვაცილოთ ჩვენი მოქალაქეები. ამ მიმართულებით მიდის მუშაობა“, - განაცხადა ხუნდაძემ.

შეგახსენებთ, რომ ჩინეთის რესპუბლიკაში საქართველოს სრულუფლებიანი ელჩის არჩილ კალანდიას განცხადებით, ჩინეთიდან საქართველოს მოქალაქეების ევაკუაციის საკითხი, ამ ეტაპზე, არ დგას.

როგორც „ინტერპრესნიუსს“ არჩილ კალანდიამ განუცხადა, როგორც უხანში, ასევე ჩინეთის სხვადასხვა რეგიონებში პრევენციის უპრეცედენტო ზომები ტარდება.

ოფიციალური ინფორმაციით, ჩინეთის ქალაქ უხანში საქართველოს 5 მოქალაქე იმყოფება.