"ამდენი ხანია შეურაცხყოფას ვითმენთ... 2 წელი ჩუმად ვიყავით და დღეიდან ყველას გაეცემა პასუხი" - მიხეილ კალანდიას ძმა
"ორი წელია კალანდიები ჩუმად ვიყავით და ყველამ თავზე გადაგვიარა" - ამის შესახებ ჟურნალისტებს სასამართლოს ეზოში მომხდარი ინციდენტის დასრულების შემდეგ, მიხეილ კალანდიას ძმამ, ლუკა კალანდიამ განუცხადა.
როგორც ბრალდებულის ძმა განმარტავს, ეს ინციდენტი პროვოცირებული იყო.
"გაღიზიანება ზაზა სარალიძის ფრაზამ გამოიწვია, ზურაბ თოდუას რომ უთხრა, ეს იყო განაჩენიო. რას ეძახის განაჩენს, ამდენი ხანი მიხეილ კალანდიას წინააღმდეგ არც ერთი მტკიცებულება რომ არ გამოჩნდა და იმას, რომ გარიგებაზე მიდის მკვლელებთან, რომ მიხეილ კალანდია დაიჭირონ?
ეს იყო ჩვეულებრივი პროვოკაცია სარალიძის თანმხლები პირის მხრიდან, რომელმაც მამაჩემს უთხრა, გამოდი შენ გარეთო. რომელი ადამიანი მოითმენდა ამას? ამდენი ხანია შეურაცხყოფას ვითმენთ, ხმას არ ვიღებთ და ეს იმას ნიშნავს, რომ თავმოყვარეობა არ გვაქვს?
ამდენი ხანი გარდაცვლილების სულებს პატივს ვცემდით, ორი წელი კალანდიები ჩუმად ვიყავით და ყველამ თავზე გადაგვიარა. დღეიდან ყველას გაეცემა პასუხი სამართლებრივად", - განაცხადა ლუკა კალანდიამ.
შეგახსენებთ, რომ თბილისის საქალაქო სასამართლოში, სადაც მირზა სუბელიანის შვილს კითხავდნენ, ხმაური იყო. დაპირისპირება თავიდან მიხეილ კალანდიასა და და ზაზა სარალიძეს შორის მოხდა. კერძოდ, მოწმის დაკითხვისას პროტესტის ნიშნად დარბაზი დატოვა ზაზა სარალიძემ, რასაც დარბაზში მიხეილ კალანდიას მამის, თენგიზ კალანდიასა და ძმის, ლუკა კალანდიას მხრიდან უკმაყოფილება მოჰყვა. ისინი დარბაზიდან სარალიძეს გაეკიდნენ, რა დროსაც კალანდიას მამამ სარალიძეს მიაძახა: "მკვდარ შვილს ჰყიდის და მე რას მიზამს? თავისი შვილის სულს ყიდის ყოველდღე, ქორვაჭარი".