ატენის ხეობაში ძლიერ ხანძარს 200-მდე მეხანძრე აქრობს - ფოტოები სტიქიის ზონიდან

შიდა ქართლში, ატენის ხეობაში, სოფელ ორმოცის მიმდებარედ, ხანძარია. ადგილზე მთელი ღამის განმავლობაში მეხანძრე-მაშველები უწყვეტ რეჟიმში მუშაობდნენ.

საგანგებო სიტუაციების მართვის სამსახურის ინფორმაციით, ცეცხლის გავრცელების არეალის მონიტორინგი დრონის საშუალებით ხდება.

ამასთან, ცოტა ხნის წინ, ქრობის პროცესში შინაგან საქმეთა სამინისტროს სასაზღვრო პოლიციის ვერტმფრენი და თავდაცვის სამინისტროს მუხლუხოიანი სახანძრო ტექნიკა ჩაერთო. დაგეგმილია ცოცხალი ძალის რაოდენობის გაზრდა 200 მეხანძრე-მაშველამდე.

ადგილზე შექმნილია სამუშაო შტაბი, რომელსაც შინაგან საქმეთა მინისტრის მოადგილე იოსებ ჭელიძე და საგანგებო სიტუაციების მართვის სამსახურის უფროსი თემურ მღებრიშვილი ხელმძღვანელობენ. ადგილზე იმყოფება სახანძრო-სამაშველო ძალების დეპარტამენტის უფროსი დავით სუხიშვილი.

"ადგილზე მობილიზებულია ცოცხალი ძალა, მუშაობს იმისთვის, რომ არ მოხდეს ცეცხლის გავრცელება. ეწყობა სამუშაო შტაბი, სადაც მთელი ღამის განმავლობაში დავრჩებით და დავგეგმავთ ღონისძიებებს.

გათენებისთანავე, პროცესში ჩაერთვება სასაზღვრო პოლიციის ვერტმფრენი და თავდაცვის სამინისტროს მუხლუხოიანი სახანძრო ტექნიკა“, - განაცხადა შინაგან საქმეთა მინისტრის მოადგილე იოსებ ჭელიძემ.