28
მარტიდღის ზოგადი ასტროლოგიური პროგნოზი
მხოლოდ ორი დღე გვაშორებს ქვეყნის ყველაზე პოპულარული კულინარიული შოუს „მასტერშეფის“ ნახევარფინალამდე, სადაც ოთხი კონკურსანტი ფინალის სამი საგზურისთვის იბრძოლებს.
AMBEBI.GE ნახევარფინალისტებს დაუკავშირდა, რათა გაერკვია, როგორი მოლოდინები აქვთ და რას პირდებიან მაყურებელს 22 დეკემბერს, 22:00 საათზე.
როგორც კონკურსანტებმა გვითხრეს, ყველაზე დაძაბული ბრძოლა გველოდება. ასევე, გაგვიმხილეს, რომ ნახევარფინალში ის მოხდება, რასაც მაყურებელი ყველაზე ნაკლებად ელის...
მარტა ბარამიძე: "ისეთი დაძაბული ამბები ელოდება მაყურებელს, რომ შოკში ჩავარდებიან. როგორც ანონსში ნახეთ, შეფების კერძებს ვამზადებთ. ზუსტად ვიცით, რომ ეს იქნება ყველაზე რთული დავალება, რაც კი მთელი სეზონის განმავლობაში ყოფილა.
არის რამდენიმე მონაწილე, რომლებსაც ჩემზე გაცილებით დიდი გამოცდილება აქვთ და მათთან შეჯიბრება უფრო რთულია. მაგალითად, ნუცა საფრანგეთში მუშაობდა, გაგა შეფ-მზარეულია და თავიანთ ტექნიკებს იყენებენ. თუმცა, „მასტერშეფში“ ყველაფერი შეიძლება მოხდეს... შეუძლებელია იმის ვარაუდი, ვინ გახდება ფინალისტი და ბოლოს ვინ გაიმარჯვებს.
დიმუ მენაბდე: "ოთხნი დავრჩით და კონკურენცია დიდია, რთულია იმის თქმა, რომელია საუკეთესო. ყველას გვაქვს ძლიერი და სუსტი მხარეები, რომლებსაც შოუს განმავლობაში კარგად ხედავდა მაყურებელი.
შოუს დასაწყისში სხვა სტრატეგია მქონდა არჩეული (რომელმაც, პრინციპში, გაამართლა), არ ვაკეთებდი სტანდარტულ კერძებს, ექსპერიმენტებს ვატარებდი და შეიძლება, მაგის გამო ვიღაცებს მიაჩნდათ, რომ სუსტი ვიყავი, მაგრამ მე ასე არ ვთვლი. ჩემგან კიდევ ბევრ რაღაცას, უფრო განსხვავებულ მიდგომასა და ტექნიკას ნახავთ.
ვფიქრობ, ნახევარფინალში ჩემი ძლიერი მხარე და უპირატესობა ისაა, რომ მარტივად ვსწავლობ რაღაცებს, ამიტომ, სხვებთან შედარებით, დავალება უნდა გამიადვილდეს. ჩემი მიზანი ფინალში გადასვლა და გამარჯვებაა.
გაგა ვარდანიძე: "მართალია, წინა ეპიზოდში პატარა ჩავარდნა მქონდა, მაგრამ ერთი ძალიან კარგი დადებით თვისება მაქვს - როდესაც ვეცემი, არ ვნებდები, უფრო ბრძოლისუნარიანი ვხდები და მალევე ვცდილობ წამოდგომას.
ყველაფერი, რაც კი ნახევარფინალამდე გავიარეთ, მარტივად მეჩვენება. ახალი დავალება ნამდვილად რთულია; ჩვენი კრეატივი, ცოდნა და ტექნიკა მაქსიმალურად უნდა გამოვიყენოთ. ეს ტური კარგად აჩვენებს, რეალურად ვის შეუძლია სამზარეულოში დგომა.
ვფიქრობ, ფინალში არის ჩემი ადგილი და ვიცი, რომ თუკი რამე ტექნიკურ შეცდომას არ დავუშვებ, აუცილებლად ვიქნები ფინალისტი. რაც კი აქამდე გინახავთ, იმაზე ასჯერ დაძაბული ბრძოლა გელოდებათ.
ნუცა სურგულაძე: "ნახევარფინალი ყველაზე მნიშვნელოვანი, გადამწყვეტი ტურია. ფინალამდე ერთი ნაბიჯიღა დარჩა და ალბათ, ყველაზე გულდასაწყვეტი იქნება, ახლა რომ გამოეთიშო ამ მარათონს. ყველაზე რთულ დავალებას მოგვცემენ და ოთხივემ მთელი ძალა, შემართება უნდა მოვიკრიბოთ, რომ ფინალამდე მივიდეთ. ფინალში ყოფნა კი მგონია, რომ უკვე გამარჯვებაა.
იმის მიხედვით, თუ ვის ჰქონდა იმუნიტეტი და ვინ იდგა აუთსაიდერებში, მგონია, რომ მარტა და გაგა არიან ყველაზე ძლიერი კონკურსანტები. შედარებით სუსტი დიმუ მგონია, რადგან მისი კერძებს ხშირად ასახელებდნენ ცუდ კერძებში. თუმცა, ეს ჩვენი პროგნოზები არაფერს არ ნიშნავს, რადგან ახლა ყველაზე პატარა შეცდომაც კი შეიძლება საბედისწერო აღმოჩნდეს.
მაყურებელმა არავითარ შემთხვევაში არ უნდა გამოტოვოს ნახევარფინალის ეპიზოდი, რადგან ნახავენ, როგორ მოვამზადებთ შეფების კერძებს. რაც მთავარია, ყველაზე მოულოდნელი, გასაოგნებელი რაღაც მოხდება, ხალხი შოკში ჩავარდება!"
ასე რომ, დაველოდოთ 22 დეკემბერს, 22:00 საათზე "მასტერშეფის" ნახევარფინალს.
ავტორი: მარიამ ტურძილაძე
უსაქმურები!