ქმარმა უსინათლო ცოლს სურნელოვანი ყვავილების ბაღი გაუშენა, რათა სამყარო სუნით შეეგრძნო

თანამედროვე ადამიანების ნაწილი სიყვარულს სკეპტიკურად უყურებს და აღარ სჯერათ ნამდვილი, გულწრფელი ურთიერთობების, მაგრამ ახლა ისეთ ამბავს მოგიყვებით, რომელიც დაგარწმუნებთ, რომ ჩვენს დროშიც შეიძლება წარმოუდგენლად რომანტიკული ურთიერთობების არსებობა, დაგაჯერებთ, რომ სიყვარულმა არც ასაკი იცის და არც დაბრკოლებების ეშინია, რომ მას ადამიანების განკურნებაც კი შეუძლია.

მისტერ და მისის კუროკები იაპონელი წყვილია, რომლებიც უკვე 30 წელია ცოლ-ქმარი არიან. მთელი ცხოვრება ფერმერობას მისდევდნენ, ორი შვილი გაზარდეს და მათი ყოველდღიურობა ბედნიერი მომენტებით იყო სავსე.

სამწუხაროდ, კუროკების ოჯახშიც მოხდა მძიმე შემთხვევა. მისის კუროკი დიაბეტით დაავადდა, რის გამოც, მხედველობა სრულად დაკარგა. ამის გამო, ქალი დეპრესიაში ჩავარდა, აღარავის ეკონტაქტებოდა, სახლში გამოიკეტა და ცხოვრების ხალისი დაკარგა.

მაგრამ მოსიყვარულე ქმარმა იპოვნა გზა, რომელიც ცოლს ცხოვრების მძიმე ეტაპის გადალახვაში დაეხმარებოდა. მას შესანიშნავი იდეა გაუჩნდა - გადაწყვიტა სახლის გარშემო სურნელოვანი ყვავილების ბაღი გაეშენებინა, რათა ცოლს გარესამყაროს აღქმა სწორედ ყვავილების სურნელით შესძლებოდა.

კაცი ორი წლის განმავლობაში მუხლჩაუხრელად მუშაობდა იმისთვის, რომ იდეა განეხორციელებინა. მოსიყვარულე ქმარმა ვარდისფერი შიბაზაკურას 7 000 ნერგი დარგო. ეს ყვავილები სასიამოვნო სურნელის გამო აირჩია.

მისტერ კუროკის თქმით, ამით უნდოდა ცოლისთვის ეთქვა, რომ სილამაზე მხოლოდ ვიზუალით არ აღიქმება, რომ სამყაროს მშვენიერება შეიძლება შეიგრძნო მაშინაც, როცა ვერ ხედავ. ქმარმა დასახულ მიზანს მიაღწია და კვლავ დაინახა ცოლის სახეზე ღიმილი.

საბოლოო ჯამში, მამაკაცმა ისეთი ლამაზი ბაღი გააკეთა, რომ მან არამხოლოდ ცოლი გაახარა და გააბედნიერა, არამედ მთელი მსოფლიოს ყურადღება მიიპყრო იაპონელი წყვილის ბაღში დამთვალიერებლის ნაკადი არ წყდება. მათ ადამიანები ბაღის დასათვლიერებლად და ულამაზესი სიყვარულის ამბის მოსასმენად სტუმრობენ.

მისის კუროკი ყოველ დღე სეირნობს ბაღში, ეგებება დამთვალიერებლებს და ყველას ღიმილს ჩუნქნის. დამთვალიერებლები ამბობენ, რომ ქალი გადამდებ ბედნიერებას ასხივებს.