"პროექტიდან მიმაქვს ბევრი სიყვარული და არაერთი კარგი მოგონება..." - ანრი გუჩმანიძემ "საქართველოს ვარსკვლავი" დატოვა

წელს ყველა აღნიშნავს, რომ „საქართველოს ვარსკვლავში“ გამორჩეულად ძლიერი კონკურსანტები არიან, მაგრამ მაყურებლის გულს საბოლოოდ მხოლოდ ერთი მოიგებს, გამარჯვებული გახდება და გაემგზავრება კიდეც "ევროვიზიის" კონკურსზე.

მეოთხე ლაივკონცერტი ლეგენდარული კომპოზიტორის - ენდრიუ ლოიდ უებერის შემოქმედებას, მის გენიალურ მიუზიკლებს მიეძღვნა და ამ ურთულეს ამოცანას თითოეულმა თავი მშვენივრად გაართვა...

მიუხედავად გამორჩეული შესრულებისა, ანრი გუჩმანიძეს კონკურსის დატოვება მაინც მოუხდა. შოუს ლიდერი კი უკვე მესამედ, თორნიკე ყიფიანი გახდა.

ანრი გუჩმანიძე:

"არ ვიცი, საიდან დავიწყო და რა ვთქვა, - ცუდი შეგრძნებაა, პროექტს რომ ვტოვებ, მაგრამ ძალიანაც არ განმიცდია, ამისთვის ნებისმიერი მზად უნდა ვიყოთ, ბოლოს ხომ მაინც ერთი რჩება?!

- ე.ი. ელოდი აუტსაიდერობას?

- ეს შეგრძნება კონკურსანტს ყოველთვის გაქვს... დღეს ყველა მეუბნება, რომ კარგად ვიმღერე, ამისთვის დიდი მადლობა ყველას, მაგრამ რა უნდა ვქნა? ასე გადაწყდა, - პროექტს გამოვეთიშე. მაყურებელი აკეთებს არჩევანს, მათზეა ყველაფერი დამოკიდებული. ასე რომ, უგულშემატკივრეთ თქვენს რჩეულს, რომ მერე გული არ დაგწყდეთ! მე ყველას თანაბრად ვგულშემატკივრობდი, ყველა ჩემი ფავორიტია და ვერცერთს ვერ დავასახელებ, ამასთან, თითეული ჩემი ახლო მეგობარიცაა.

- პროექტიდან რა მიგაქვს?

- ბევრი სიყვარული, პოზიტივი და არაერთი კარგი მოგონება...

მანანა მორჩილაძე, "საქართველოს ვარსკვლავის" მუსიკალური პროდიუსერი:

- ენდრიუ ლოიდ ვებერის შემოქმედება ყველამ კარგად ვიცით და ისიც, როგორი რევოლუციონერი კომპოზიტორი იყო. მან მოახერხა კლასიკურ მუსიკაში გადატრიალება მოეხდინა - ცნობილი როკ ოპერა მიუზიკლად გადააკეთა. მის მუსიკას ჟღერადობა არ ტოვებს და ეს სინთეზი მისი გენიალურობის მაჩვენებელია...

შესაბამისად, არ იყო ადვილი ამ ბუმბერაზ კომპოზიტორთან შეჭიდება. ეს მხოლოდ ვოკალურ სირთულეს არ გულისხმობდა, მთელ იმ სიუჟეტს, თითოეული როკოპერის შინაარსს, ლიბრეტოს, რომელიც მომღერალს ერთი ნამღერით უნდა გადმოეცა.

მიხარია, რომ ყველა კონკურსანტი პასუხისმგებლობით მოეკიდა. მათგან ბევრს ნანახიც არ ჰქონდა მისი მიუზიკლები, თუმცა შესანიშნავად დაძლიეს. თითოეულმა შეისწავლა და საკუთარ ნამღერში, კომპოზიციაში მაქსიმუმი ჩადო.

- რაც შეხება ანრი გუჩმანიძეს, რომელმაც ასევე კარგად შეასრულა კომპოზიცია, მაგრამ დღევანდელ ტურს გამოეთიშა?

- ძალიან გული დამწყდა, რადგანაც შემდეგი ტური გია ყანჩელის იქნება. ძალიან მინდოდა, ანრი ყოფილიყო იმ ტურში, კიდევ ერთ განსხვავებულ სახეს წარმოადგენდა. ის იყო ერთადერთი კონკურსანტი, რომელიც ყოველ ჯერზე სხვადასხვაგვარად გვევლინებოდა.

- უკვე მესამედ, პროექტში ლიდერი თორნიკე ყიფიანი გახდა...

- ყიფიანს აქვს ის მთავარი რამ, რაც მომღერალს სჭირდება - ის უყვარს ხალხს, მოკლედ და კონკრეტულად!

დათო ევგენიძე, ჟიურის წევრი:

- ძალიან მახარებს ის ამბავი, რომ პროექტს ძალიან სერიოზული კონკურსანტები ჰყავს. საოცრად მომზადებული ბავშვები მოვიდნენ, ყოველი ტური ჩემთვის აღმოჩენაა, მიუხედავად იმისა, რომ ქასთინგებიდან დაწყებული, მათ თვალ-ყურს ვადევნებთ. მგონია, რომ ყოველი მათგანი ტურიდან ტურამდე, ჟანრულ და ტემბრალურ მონაცემებში აღმოჩენებს აკეთებს.

სულ ვიცოდი, რომ საქართველო სიმღერის ქვეყანაა, მაგრამ მართლა არ ილევა ნიჭიერი ადამიანები, რითაც ამაყი ვარ. ეს უდიდესი ბედნიერებაა!

საოცარი კონცერტი იყო და ეს არის პირველი შემთხვევა, როდესაც შოუში საკონკურსოდ უებერის ლეგენდარული ოპერებიდან ამდენი ნამუშევარი შესრულდა. ამ ყველაფრისთვის ხელის მოკიდებას, ამ ურთულესი არიების შესრულებას, გამბედაობა სჭირდება.

ასე რომ, წლევანდელი „საქართველოს ვარსკლვლავი“ ნამდვილად შედგა! არც წინა ჯერზე იყვნენ ცუდები, მაგრამ ესენი გამორჩეულები არიან! დარწმუნებული ვარ, „ევროვიზიაზე“ ვინც უნდა წავიდეს, გამორჩეულად ნიჭიერი იქნება. ამ შემთხვევაში „პირველ არხს“, ჩვენც და მთლიან ჯგუფს ზუსტი გზავნილით გაგზავნა მოგვიწევს, რადგანაც „ევროვიზია“ არ არის მხოლოდ სიმღერა - ეს კომპლექსია ძალიან ბევრი რაღაცის. ამიტომ სერიოზული მუშაობა მოგვიწევს, რომ დავიმსახუროთ ის ადგილები და შეფასებები, რასაც ქართული სიმღერა იმსახურებს, მიუხედავად იმისა, რომ ეს კონკურსი პოლიტიკაც არის.