ულამაზესი ზუგდიდელი გოგონას წარმატება სმენადაქვეითებულთა სილამაზის კონკურსზე - "ყველა გრძნობა ერთად მერეოდა..."

იტალიაში, გალლიპოლიში გამართულ სმენადაქვეითებულთა სილამაზის მსოფლიო კონკურსში Miss & Mister Deaf Stars 2019 "მისს ფოტოგენურობის" ტიტული და მესამე ადგილი 18 წლის თამარ ხაზალიამ მიიღო. იგი წარმოშობით ზუგდიდის რაიონის სოფელ ორსანტიიდან არის. ამბობს, რომ მოდელობაზე ბავშვობიდან ოცნებობდა.

AMBEBI.GE-სთან საუბარში იხსენებს, რომ ბავშვობაში სილამაზის კონკურსებსა და მოდების ჩვენებებს უყურებდა და მოდელების მოძრაობებს იმეორებდა. სამოდელო სფეროში პირველ წარმატებას 11 წლის ასაკში მიაღწია. რაც შეეხება იტალიაში გამართულ კონკურსს, თამუნა ხაზალია იქ საქართველოს ყრუთა საზოგადოების ინიციატივით მოხვდა.

"ყოველთვის მხიბლავდა ცეკვა, ქართულიც და თანამედროვეც, მიყვარდა სილამაზის კონკურსებისა და მოდის ჩვენების ყურება, ვიმახსოვრებდი და ვიმეორებდი მოძრაობებს. 11 წლის ვიყავი, როდესაც სკოლის სილამაზის კონკურსში გავიმარჯვე - პირველი ადგილი დავიკავე. 14 წლის ასაკში კი მონაწილეობა მივიღე სილამაზის კონკურსში, სადაც "მის სიმპათია" გავხდი. ხოლო წელს ზაფხულზე ყრუთა საზოგადოების ხელმძღვანელმა ფლორა ბეჟანიშვილმა შემომთავაზა მონაწილეობის მიღება მსოფლიო სილამაზის კონკურსში, რომელიც იტალიაში უნდა ჩატარებულიყო, ძალიან მაცდური შემოთავაზება იყო, სილამაზის კონკურსი, იტალია....

რა თქმა უნდა, ბევრი არ მიფიქრია და დავთანხმდი, დიდი საზრუნავი გამიჩნდა, მინდოდა ღირსეულად წარვმდგარიყავი... ხუმრობა ხომ არ იყო, საქართველო უნდა წარმომედგინა, მოვამზადე ტანსაცმელი... პირველ რიგში, ქართული კაბა. 28 ოქტომბერს გავემგზავრე მილანში. ჩვენი ჯგუფი 4 ადამიანისგან შედგებოდა. პირველი დღიდანვე ემოციებში ჩავიძირე, 4 დღე სხვადასხვა ქალაქებში ექსკურსიებზე დავდიოდით, არაჩვეულებრივი გარემო იყო.

საკონკურსო ქალაქი გალლიპოლი იყო. ეს პატარა ზღვისპირა ქალაქი ულამაზესი აღმოჩნდა, ისტორიული ძეგლებითა და არაჩვეულებრივი გარემოთი. კონკურსისთვის 1 ნოემბრიდან 9 ნოემბრამდე ვვარჯიშობდით და ვემზადებოდით. ეს იყო საუკეთესო დრო ახალი მეგობრების გასაცნობად. ბევრი მეგობარი შევიძინე. კონკურსის დღე საოცარი იყო იმით, რომ ამდენი ადამიანი ერთმანეთს გულშემატკივრობდა. ეს იყო ადამიანების მეგობრობისა და ურთიერთპატივისცემის საუკეთესო მაგალითი. მე მესამე ადგილი დავიკავე. ყველა გრძნობა ერთად მერეოდა, ბედნიერი ვიყავი. ეს ის შემთხვევაა ადამიანის ცხოვრებაში, რომლის დავიწყებაც შეუძლებელია. მადლობა ყველას, ვინც დამეხმარა, რომ ასეთი დიდი კონკურსის მონაწილე ვყოფილიყავი“, - ამბობს თამუნა ხაზალია.

აღსანისნავია, რომ ამავე კონკურსში მესამე ადგილის მფლობელი და "მისტერ ფოტოგენურობა" გახდა ასევე საქართველოს წარმომადგენელი აკაკი ცანკაშვილი.

18 წლის თამარი თბილისის 203-ე საჯარო სკოლის მე-11 კლასის მოსწავლეა. თავისუფალ დროს კი ყრუთა კავშირთან არსებულ ქორეოგრაფიულ ანსამბლ "ლილეში" ცეკვავს ან ხატავს. ასევე ამუშავებს საგალობლებს ჟესტურ ენაზე.