ბრაზილიის პრეზიდენტი ლეონარდო დიკაპრიოს ამაზონის ტყის გადაწვაში ადანაშაულებს

ბრაზილიის პრეზიდენტი ჟაირ ბოლსონარო ჰოლივუდის ვარსკვლავს ლეონარდო დიკაპრიოს ამაზონის ტყეების წინასწარგანზრახულ გადაწვაში ადანაშაულებს. პრეზიდენტის მტკიცებით, მსახიობი და გარემოდამცველი აქტივისტი აფინანსებს არასამთავრობოებს, რომლებიც ამაზონის ტყეებში ხანძრის გაჩენაში არიან ეჭვმიტანილნი.

მსახიობის ხანძრებთან კავშირზე, პრეზიდენტის პოლიტიკოსი ვაჟი ედუარდო ბოლსონაროც საუბრობს. როგორც მან ტვიტერზე დაწერა, "დიკაპრიომ 300 000 დოლარი გადაუხადა არასამთავრობო ორგანიზაციას, რომ მათ ამაზონის ტყეში ხანძარი გაეჩინათ".

ბრაზილიის პრეზიდენტის მტკიცებით, დიკაპრიოს დაფინანსებით მსოფლიოს ველური ბუნების ფონდი (WWF) მოხალისე მეხანძრეებს ფულს უხდიდა, რომ ამაზონის ტყეებში არსებულ ვითარებაზე სურათები გადაეგზავნათ მათთვის. ამასთან, ბოლსონაროს თქმით, მეხანძრეები ცეცხლს აჩენდნენ, რომ დაფინანსება მოეპოვებინათ.

"ლეონარდო დიკაპრიო, შენ თანამშრომლობ ამაზონის დაწვის საქმეში, ეს კამპანიაა ბრაზილიის წინააღმდეგ... მაგარი ბიჭია ხომ დიკაპრიო? ასეა არა? მან ფული ამაზონისთვის ცეცხლის წაკიდებაში გადაიხადა" - განაცხადა ბოლსონერომ.

ბრალდებებს კატეგორიულად უარყოფენ გარემოსდამცველი ორგანიზაციები. მათი განცხადებით, ბრაზილიის მთავრობა არასამთავრობო ორგანიზაციების დაშინების პოლიტიკითაა დაკავებული.

უმძიმესი ხანძრები ამაზონის ტყეში აგვისტოში გაჩნდა. ტროპიკულ ტყეებში ათასობით ცეცხლის კერა მძვინვარებდა. ათწლეულების განმავლობაში ეს ყველაზე სასტიკი სტიქია იყო.

გასულ წელთან შედარებით ხანძრების რაოდენობა ბრაზილიაში 85%-ით არის გაზრდილი. სტიქია ტროპიკული ტყეებისთვის მშრალ სეზონზე უცხო არ არის, მიზეზი კი ხშირად ხდება ბუნებრივი მოვლენები - მაგალითად, მეხი, თუმცა ხანძრებში დამნაშავე მეტყევეები და ფერმერებიც არიან, რომლებიც ხეებს დაუნდობლად ჩეხავენ და მიწას ასუფთავებენ.

გარემოსდამცველი აქტივისტები მეტყევეების წახალისებაში ბრაზილიის პრეზიდენტს, ჟაირ ბოლსონაროს ადანაშაულებენ. ბოლსონარო კი, რომელიც კლიმატური ცვლილებების მიმართ სკეპტიკურად არის განწყობილი, ამბობს, რომ ხანძრების გაჩენა და ხელისუფლების იმიჯის შელახვა არასამთავრობო ორგანიზაციების ბრალია...

ხანძრების დროს, ლეონარდო დიკაპრიოს გარემოს დაცვისთვის შექმნილმა ფონდმა ამაზონის ტყის ხანძართან გასამკლავებლად 5 მლნ დოლარი გამოყო.