13
მაისიდღის ზოგადი ასტროლოგიური პროგნოზი
23 ნოემბერს, გიორგობის დღესასწაულთან დაკავშირებით, კინოთეატრი "ამირანი" და Artists Union ConceptArt უნიკალურ პროექტს წარმოგიდგენთ - კინოთეატრის სცენაზე შედგება გია ყანჩელის შესახებ გადაღებული ფილმის "სევდის ანგელოზების" პრემიერა და მაესტროს ნაწარმოებების ცოცხალი შესრულება.
"სევდის ანგელოზების" სცენარისტი და რეჟისორი თეონა ჯორბენაძეა. ფილმის ჩვენებამდე კომპოზიტორი და დირიჟორი ნიკოლოზ რაჭველი, აღიარებული ალტისტი გიორგი ცაგარელი და ეროვნული სიმფონიური ორკესტრის მუსიკოსები ესტაფეტას ახალი თაობის ვარსკვლავებს გადასცემენ. საღამოს გახსნის და სპეციალურად შექმნილ კომპოზიციას მაესტროს ხსოვნას 10 წლის კომპოზიტორი და პიანისტი ცოტნე ზედგინიძე მიუძღვნის.
როგორ შექმნა ცოტნემ ეს პიესა, როგორი იყო მისი შეხვედრა გენიალურ კომპოზიტორთან - ამაზე AMBEBI.GE-სთან პატარა ვირტუოზის ბებია ნინა მამრაძე მოგვითხრობს:
"როდესაც გასულ ზაფხულს ცოტნეს პირველი კონცერტი შედგა, რამდენიმე დღეში, ჩვენ ბატონ გია ყანჩელთან მივედით. ეს იყო 14 ივნისი და სწორედ მაშინ გაიცნო ცოტნე გია ყანჩელმა. კომპოზიტორს მოვასმენინეთ ის, რაც ბავშვმა შექმნა, საკუთარი ნაწარმოები.
ბატონი გია იმ პერიოდში უკვე შეუძლოდ იყო და იწვა, მაგრამ მთელი თავისი კეთილი გულით, კეთილშობილებით, ბავშვი მიიღო, მერე საწოლზე წამოჯდა და უთხრა: "მოდი, ცოტნე, დამიკარიო". რომ მოისმინა, გაოცებული გამომეტყველება ჰქონდა, მერე თავისთან მოიხმო და თავზე აკოცა...
ვკითხე - რას გვირჩევთ? თქვენი რჩევა ჩვენთვის მნიშვნელოვანია-მეთქი. ვერაფერს, ამისთვის მზად არ ვარ, არ მეგონა, ვერ წარმომედგინა, თუ ასეთ ადამიანს შევხდებოდი, არაფერი ამდაგვარი არ მინახავს, ამაზე უნდა ვიფიქრო, ისე ვერაფერს გეტყვით, არ არის ეს ნორმალურიო - სიცილით მიპასუხა...
ცოტნე მუსიკის კეთების პარალელურად, ჩვეულებრივი ბავშვია, დარბის, თამაშობს, საათები როიალთან იჯდეს, ასე არ არის. ძალიან უყვარს ნაწარმოების გარჩევა, ოპერის კლავირებს უკრავს. წერს მოთხრობებს, დადგმებსაც აკეთებს და, რა თქმა უნდა, თამაშობს თავის პატარა დასთან. სახლში ისეთი ამბავია, ყირაზე გადადიან ხოლმე...
- ის პირველი შეხვედრა კომპოზიტორთან როგორ დასრულდა?
- კიდევ უნდა გვენახა ბატონი გია და ვეღარ მოხერხდა, რადგანაც რეანიმაციაში იწვა, თუმცა ტელეფონით ვესაუბრე... ასე რომ, ცოტნეს სამუდამოდ დარჩა დიდ კომპოზიტორთან საოცარი შეხვედრა და მისი ასეთივე დახვედრა.
სიტყვებით ვერ გადმოვცემ, როგორ უყურებდა ბავშვს და როგორ მოეფერა. ამბობდა, საუკუნეში ერთხელ იბადება ამ მონაცემების ადამიანი, ამ ეტაპზე არანაირი რჩევა საჭირო არ არის, უბრალოდ, სჭირდება შესაბამისი გარემო, სიმშვიდე და ჯანმრთელი ცხოვრებით ცხოვრება - ირბინოს, ითამაშოს და მუდმივი დაკვირვება, დააკვირდითო.
- ცოტნემ როდის დაწერა კომპოზიცია, რომელიც მის ხსოვნას მიუძღვნა?
- 1-ელ ოქტომბერს ცოტნეს კონცერტი ჰქონდა ოპერაში ეროვნულ ორკესტრთან, ნიკოლოზ რაჭველის დირიჟორობით, სეზონის გახსნა იყო. შოსტაკოვიჩის მეორე კონცერტი დაუკრა...
ცოტნემ რომ დაუკრა, ბატონი გია ცუდად იყო... კონცერტის შემდეგ ნიკასთან და ბავშვებთან ერთად ვიყავით, არ ვიცოდით და თურმე იმ ღამეს, 2-ში გარდაცვლილა მაესტრო...
ცოტნემ საოცრად განიცადა... მოსმენილი ჰქონდა ბატონი გიას ნაწარმოებები, მისი სიმფონიები, კინომუსიკა, თეატრისთვის შექმნილი მუსიკა და კომპოზიცია უცებ შექმნა, რომელიც გია ყანჩელს მიუძღვნა...
მასში ყანჩელის არცერთი ციტატა არ არის, მაგრამ სტილისტურად, ჩემი აზრით, იმდენად გადმოსცემს, ყანჩელის თვისებებს, ინდივუდუალობას და ამით ჩემთვის ძალიან ძვირფასია. პიესა სულ 7 წუთამდე გრძელდება.
- ცოტნეს ხომ არ შეუძლია სანოტო სისტემაზე მუსიკის გადატანა, ასე ზეპირად იმახსოვრებს?
- კი, მისი ნაწარმოები არ არის ჯერ ჩაწერილი... მოკლედ, 23 ნოემბერს კინოთეატრ „ამირანში“ თეონა ჯორბენაძის ფილმის პრემიერაზე, რომელიც გია ყანჩელს ეძღვნება, კონცერტიც გაიმართება და ცოტნე ამ პიესას იქ დაუკრავს.
საუბარს 10 წლის ვირტუოზთან ვაგრძელებთ: "მას მერე, რაც გია ყანჩელი გავიცანი, მის მუსიკას სულ ვუსმენდი, ახლაც ვუსმენ და ასე მოსმენის შემდეგ, შევქმენი ჩემი ნაწარმოები..."
- როგორია ბატონი გიას მუსიკა, შენთვის როგორ ჟღერს?
- სასიამოვნოა, ძალიან მომწონს. გია ყანჩელი დიდი კომპოზიტორია, მიხარია, რომ ასეთი კომპოზიტორი ჰყავს საქართველოს და მე ის გავიცანი. როდესაც შევხვდი, მივხვდი, რომ ძალიან კეთილი ადამიანი იყო. რომ მივედი, საწოლში იწვა და წამოჯდა, მთხოვა, პიანინოზე დამეკრა, მერე დამიძახა და მაკოცა, ძალიან საყვარელი კაცი იყო. ის ასეთი მემახსოვრება სულ..."
28 დეკემბერს კონსერვატორიის დიდ საკონცერტო დარბაზში ცოტნე ზეგდინიძის კონცერტი შედგება.
უფალო, დიდება შენ! საიდან ჩდებიან ასეთი ვირტუოზები?!
დიდება უფალს, არ გვტოვებს დიდი ნიჭიერების გარეშე. ეს ბავშვი ბევრ სასწაულს დაგვიწერს.. უფალმა დაგლოცოს ცოტნე.....