"სიხარულისგან მეტირება..." - ჟიურის და კონკურსანტების ემოციები "საქართველოს ვარსკვლავის" პირველი ლაივის შემდეგ

"საქართველოს ვარსკვლავის" პირველი ლაივშოუ შედგა და კონკურსი უკვე დატოვა კონკურსანტმა მერაბ ამზოევმა. პირველი ლაივის ლიდერი თამარ კაკალაშვილი გახდა. 22 წლის გოგონა ამ წარმატებით უზომოდ ბედნიერია და დიდი შემართებით აგრძელებს ბრძოლას შემდეგი ტურებისთვის.

ლაივის დასრულების შემდეგ AMBEBI.GE "საქართველოს ვარსკვლავის" პირველი ტურის ლიდერს და ჟიურის გაესაუბრა:

თამარ კაკალაშვილი:

"იმდენად კარგი ათეული ვართ, რომ ნამდვილად არ ველოდი, თუ დღევანდელი დღის ლაივის ლიდერი გავხდებოდი. ვიმეორებ - ყველა თავისებურად ლიდერია! ისეთი ბედნიერი ვარ, რომ სიხარულისგან მეტირება. მინდა, ასე გაგრძელდეს და ჩემი მხარდაჭერა და გულშემატკივრობა ხალხმა არ შეწყვიტოს და პირიქით, უფრო გააქტიურდნენ, ჯერ ყველაფერი წინ არის..."

დათო ევგენიძე, ჟიურის წევრი:

"პირველ რიგში მინდა, მივულოცო საქართველოს და „პირველ არხსაც“ ის 10 შესანიშნავი შემსრულებელი, რომელიც ფილარმონიის სცენაზე წარსდგა. ეს იყო აბსოლუტურად სრულყოფილი კონცერტი - ეს სცენა, რასაც ფილარმონიის საკონცერტო დარბაზი ჰქვია, ათივე მონაწილეს დამსახურებულად ეკუთვნის. დღეს არ მქონდა კონკურსის შეგრძნება, ეს სრულყოფილი კონცერტის ემოცია გახლდათ!

ვფიქრობ, მათთვის ძალიან რთული იქნება შემდეგ ტურებში ასპარეზობა. საბედნიეროდ, ჩვენი ასარჩევი აღარაა, ვინ დარჩება და ვინ - არა. ასეთი ათეულის შემთხვევაში მართლაც ძნელია, ვინმე გაუშვა, თუმცა უკვე 9 კონკურსანტი დარჩა. პროექტი პირველმა მონაწილემ დატოვა - მერაბ ამზოევი საოცარი ბიჭია, ვგულშემატკივრობ და ის აუცილებლად იპოვის გზას თავისი საოცარი ტემბრით. ეს წარუმატებლობა არ უნდა გახდეს მისთვის ტკივილიანი, საოცარი მომავალი ელოდება.

მაყურებლის ნაცვლად ძნელია, რაიმე განსაზღვრო. ეს კონკურსია და ყოველ ლაივზე ერთი ადამიანი ტოვებს შოუს".

დათუნა ალადაშვილი, ჟიურის წევრი:

"მგონი, ბევრი დამეთანხმება იმაში, რომ არაჩვეულებრივი პირველი ლაივი იყო, ამ ტიპის, ამ ხარისხის, ამ რანგის ათეული არ მახსოვს, საქართველოში რომელიმე სხვა კონკურსში.

ცუდი ისაა, რომ ერთ-ერთს პირველ ეტაპზე უნდა დაეტოვებინა შოუ. გულდასაწყვეტია, რომ მერაბი რომელიც, არაჩვეულებრივი ვოკალური მონაცემების ადამიანია, საინტერესო ხმის ტემბრი აქვს, ძალიან ნიჭიერი არტისტია, პირველი აღმოჩნდა - დატოვა კონკურსი და შემდეგ ეტაპებზე მონაწილეობას აღარ მიიღებს.

თუმცა, ისიც აღსანიშნავია, რომ ის 9 კონკურსანტი, რომლებიც შემდეგ კვირას ჩვენთვის იმღერებენ, ერთმანეთზე უკეთესები არიან. თავიდანვე ვამბობდი და ახლაც ვიტყვი, რომ იმდენად კარგი ნაკადია, იმდენად კარგი ათეული შეირჩა, რომ ვერავის გამოვყოფ, ვინ შეიძლება, დატოვოს კონკურსი. დარწმუნებული ვარ, გარდა იმისა, რომ ყველა ერთად აღვნიშნავთ ახალი წლის მოსვლას, აღვნიშნავთ იმასაც, რომ მართლაც ღირსეული კონკურსანტი და არტისტი წარადგენს საქართველოს ევროვიზიაზე.

რაც შეეხება დღის ლიდერს, თამარ კაკალაშვილს - ის არაჩვეულებრივი მომღერალია. ის გორის გოგონათა გუნდთან ერთად წარსდგა და ეს შესრულება მართლაც იმსახურებდა ლიდერობას.

საერთოდ კი, ყველაფერი მაყურებლის ხელშია. ამიტომაცაა ეს კონკურსი საინტერესო. იმედი მაქვს, ჟიურისთან ერთად, ჩვენს მითითებებს გაითვალისწინებენ და საბოლოო ჯამში ობიექტურ და სწორ ხარისხიან გადაწყვეტილებას მივიღებთ".