სურსათის სააგენტომ 45 საზოგადოებრივი კვების ობიექტში დარღვევები გამოავლინა

სურსათის ეროვნული სააგენტოს ინფორმაციით, ბოლო ორ თვეში 45 ობიექტი დაჯარიმდა საკვების საწარმოო პროცესში კრიტიკული შეუსაბამობების გამო.

როგორც სააგენტოს მიერ გავრცელებულ განცხადებაშია აღნიშნული, კონტროლი მიმდინარეობს მთელი ქვეყნის მასშტაბით და მოწმდება კაფე-ბარების, რესტორნების, აგრეთვე სკოლების, საბავშვო ბაღების, ბავშვთა სკოლა-პანსიონების კვების ბლოკები.

"სააგენტოს ინსპექტირების ჯგუფებმა მიმდინარე წლის ოქტომბერსა და ნოემბერში განახორციელეს 976 დოკუმენტური შემოწმება და 229 ინსპექტირება.

გამოვლენილი კრიტიკული შეუსაბამობების გამო, 45 ბიზნესოპერატორი დაჯარიმდა და შეუჩერდა საწარმოო პროცესი. მათ შორის განსაკუთრებით სავალალო მდგომარეობა და დარღვევები გამოვლინდა ქვემო ქართლის, აჭარის, გურიისა და სამცხე-ჯავახეთის ბავშვთა სკოლა-პანსიონების კვების ბლოკებში.

კანონმდებლობით გათვალისწინებული ღონისძიებები გატარდა სააგენტოს მიერ გაურკვეველი წარმომავლობის ხორცისა და ვადაგასული სურსათის განთავსების ფაქტებთან დაკავშირებით. კერძოდ, სურსათი დაილუქა და მის განადგურებაზე ზედამხედველობას სურსათის ეროვნული სააგენტო განახორციელებს.

ბიზნესოპერატორებს, რომლებმაც სააგენტოს სპეციალისტების მიერ მიცემული მითითებები გაითვალისწინეს, საწარმოო პროცესი უკვე აღუდგათ", - ნათქვამია სურსათის ეროვნული სააგენტოს ინფორმაციაში.