აფეთქებისას მძიმედ დაშავებული მამაკაცი ეკონომიკის სამინისტროს თანამშრომელია - საავადმყოფოში ნათია თურნავა მივიდა

39 წლის მამაკაცი, რომელიც გურამიშვილის გამზირზე მომხდარი აფეთქების შედეგად მძიმედ დაშავდა, ეკონომიკის სამინისტროს თანამშრომელი სოსო ჯავახიშვილია.

ის ხეჩინაშვილის სახელობის საუნივერსიტეტო კლინიკაშია გადაყვანილი, სადაც ცოტა ხნის წინ ეკონომიკის მინისტრი ნათია თურნავა მივიდა.

არსებული ინფორმაციით, მძიმედ დაშავებული ჯავახიშვილი იმ ბინაში ცხოვრობს, სადაც აფეთქება მოხდა. 39 წლის მამაკაცი ქონების ეროვნული სააგენტოს თანამშრომელია.

"ძალიან სამწუხარო შემთხვევაა და ჩვენთვის ახლა ყველაზე მნიშვნელოვანი ადამიანების ჯანმრთელობაა. ახლა პირველ რიგში, მინდა სოსო, მისი ახლობლები და სხვა დაზარალებულები მოვინახულო. ჩვენ გავამკაცრეთ კანონმდებლობა და წესები. გაზგამანაწილებელი კომპანიები ახორციელებენ გეგმურ შემოვლას და ამოწმებენ მოსახლეობას, ყველგან, სადაც გაზის მოწყობილობებია და ჭრიან იმ გაზის მოწყობილობებს, რომლებიც თვითნებურადაა დამონტაჟებული, მაგრამ თუ თვითონ მოსახლეობა არ გვეთანამშრომლება და გაგებით არ მოეკიდა ამ ყველაფერს, ასეთი შემთხვევების პრევენცია რთული იქნება.

ამიტომ მინდა მოვუწოდო ჩვენს მოქალაქეებს: დადგა გათბობის სეზონი და მაქიმალური სიფრთხილე გამოვიჩინოთ. აუცილებლად მივცეთ გაზგამანაწილებელ კომპანიებს შესაძლებლობა, რომ შემოვიდნენ და შეამოწმონ მოწყობილობები.

თუ აუცილებელი გახდა გამოცვლა და თუ მიიღეს რეკომენდაცია, რომ შეცვალონ ეს მოწყობილობები, თვითნებურად არ მიაერთონ, რადგან საუბარია ადამიანების ჯანმრთელობასა და სიცოცხლეზე. ჩვენ ასევე სავალდებულო წესით შემოგვაქვს დეტექტორების დამონტაჟება, ეს ჰაერში ზედმეტ გაზის არსებობის შემთხვევაში შეგვატყობინებს და დაგვიცავს უბედური შემთხვევისაგან. ეს კი როგორც ახალ აშენებულ შენობებს, ისე - ძველ შენობებს შეეხება", - განაცხადა ნათია თურნავამ.

ექიმების განცხადებით, ჯავახიშვილს სხეულის 60% აქვს დამწვარი. მას დამწვრობა მიღებული აქვს ცეცხლის ალით და მდგომარეობა უმძიმესია. ძირითადად სასუნთქი გზები აქვს დამწვარი.

პაციენტი დამწვრობითი შოკის მდგომარეობაში იმყოფება და მიმდინარეობს ძლიერი ანტიშოკური თერაპია.