გლდანში დაჭრილ მოზარდს კიდევ ერთი ოპერაცია უტარდება - დაჭრის ფაქტზე დაკავებულს პატიმრობა შეეფარდა

მეტროსადგურ „ახმეტელის თეატრის“ მიმდებარე ტერიტორიაზე არასრულწლოვნის დაჭრის ფაქტზე დაკავებულ სერგო ოსმინკინს აღკვეთის ღონისძიების სახით პატიმრობა შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლე ეკა კულულაშვილმა გამოაცხადა. სხდომა დახურულ რეჟიმში ჩატარდა, ვინაიდან დაზარალებული არასრულწლოვანია.

სხდომის დახურვის შუამდგომლობა ბრალდების მხარემ დააყენა, რასაც დაცვის მხარეც დაეთანხმა.

დაკავებულისთვის აღკვეთის ღონისძიების სახით პატიმრობის შეფარდება პროკურატურამ მოითხოვა. დაცვის მხარემ კი დაკავებულის აღკვეთის ღონისძიების გარეშე დატოვების შუამდგომლობა დააყენა.

ცნობისთვის, არასრულწლოვანი ორი დღის წინ, შემთხვევით გამვლელმა, ნასვამ მდგომარეობაში მყოფმა მამაკაცმა დაჭრა.

მამაკაცი სამართალდამცავებმა ადგილზევე დააკავეს.

დაჭრილის მდგომარეობა კვლავ მძიმეა. ექიმის ინფორმაციით, მოზარდს კიდევ ერთი ქირურგიული ოპერაცია უტარდება.

„პაციენტის ჯანმრთელობის მდგომარეობა ისევ საკმაოდ მძიმეა. ამჟამად იმყოფება საოპერაციო ბლოკში, სადაც დაგეგმილი განმეორებითი ოპერაციული ჩარევა მიმდინარეობს. ქირურგიული ჩარევა ჯერჯერობით არ დასრულებულა და შესაბამისად, ოპერაციის მასშტაბზე საუბარი ამ ეტაპზე გაგვიჭირდება", - განაცხადა რეანიმატოლოგმა ქეთევან კუპატაძემ.

გამოძიება სისხლის სამართლის კოდექსის 19/109 მუხლით დაიწყო, რაც არასრულწლოვნის მიმართ დამამძიმებელ გარემოებაში ჩადენილ განზრახ მკვლელობის მცდელობას გულისხმობს. ჩადენილი დანაშაული 13-დან 17 წლამდე თავისუფლების აღკვეთას ითვალისწინებს.