როგორ გამოიყურება მაკა ასათიანის და ჯაბა დიასამიძის კონცეპტუალური სივრცე ბარსელონაში

ბერსელონაში ქართველმა დიზაინერებმა მაკა ასათიანმა და ჯაბა დიასამიძემ კონცეპტუალური სივრცე "დარიალი" (Darial) შექმნეს, რომელიც მოდას, ხელოვნებასა და ცხოვრების სტილს აერთიანებს.

"დარიალის" ახალ სივრცეში გადაღებულ ფოტოებს და ინფორმაციას მოდის ვებ-გვერდი drapersonline.com ავრცელებს.

1500 კვ. მეტრის სივრცე ბარსელონას ცენტრში მე-19 საუკუნის ღირსშესანიშნავი შენობის Casa Tomàs Roger-ის პირველ სართულზეა განთავსებული. სივრცე მოიცავს რესტორანს, სახელწოდებით Le Leopard, ასევე საგამოფენო სივრცეს, სახლის დეკორისა და ტანისამოსის მაღაზიებს.

აქ მომხმარებელს შეუძლია მსოფლიოს სხვადასხვა ქვეყნის ასამდე დიზაინერის მამაკაცის და ქალის სამოსის შეძენა, მათ შორის ისეთი დიზაინერული ბრენდების, როგორებიცაა: Raf Simons, Haider Ackerman, Jil Sander, Mackintosh, Tata Naka და სხვები. რითეილ მაღაზიაში ფასები 50 ევროდან 5 000 ევრომდე მერყეობს.

რაც შეეხება საგამოფენო სივრცეს, ის გამოფენებს, კოლაბორაციებსა და თანამედროვე არტისტებს უმასპინძლებს.

"დარიალის" კრეატიული დირექტორი ჯაბა დიასამიძეა. მასშტაბური სივრცის გახსნაზე ის, მაკა ასათიანი და პარტნიორები, თვეების განმავლობაში მუშაობდნენ.