მნიშვნელოვანი ინფორმაცია
30
მარტიდღის ზოგადი ასტროლოგიური პროგნოზი
კვირა, მთვარის მეორე დღე დაიწყება 07:11-ზე, მთვარე ვერძშია
კარგი დღეა ნებისმიერი საქმის დასაწყებად; ფინანსური საკითხების მოსაგვარებლად; ვაჭრობისთვის. არ იკამათოთ, გადადეთ სასამართლო საქმეები. კარგ დღეა შემოქმედებითი და სამეცნიერო საქმეებისთვის. სწავლისთვის და გამოცდების ჩასაბარებლად. უფროსთან შეხვედრა სიკეთეს არ მოგიტანთ. კარგი დღეა საქმიანობის, სამსახურის შესაცვლელად. თამამად გაემგზავრეთ სამოგზაუროდ, მივლინებაში. სხვა დღისთვის გადადეთ ნიშნობა და ქორწინება. შეამცირეთ ალკოჰოლისა და სასმლის დოზა. მოერიდეთ ყოველგვარ ოპერაციასა და პროცედურას: თვალებზე, პირის ღრუში, ყურებზე; აგრეთვე დიდხანს კითხვასა და ტელევიზორის ყურებას.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"ტაქსს ველოდი 50 წუთი და ბავშვივით ვტიროდი..." - რა პრობლემები შეუქმნა თბილისს "თეთრი ტაქსების რევოლუციამ"
14:35 / 05-10-2019
თბილისში მგზავრთა ტრანსპორტირება ისედაც მწვავე პრობლემაა, თუმცა განსაკუთრებით გამწვავდა პირველი ოქტომბრიდან, რაც ტაქსებზე ახალი რეგულაციები ამოქმედდა.
ცვლილებებმა, როგორც გამოძახების, ისე თეთრის ტაქსების მომსახურების ფასი მომენტალურად გაზარდა. მაგალითად, თუ დიდი დიღმიდან ჟვანიას მოედნამდე მგზავრობა 5 ლარი ღირდა, ახლა 8 ან 9 ლარის გადახდა მოგიწევთ. ამ ფონზე გაიზარდა ავტობუსებსა და სამარშრუტო ტაქსებში მგზავრთა რაოდენობა მაშინ, როცა აღნიშნული სატრანსპორტო საშუალებები ისედაც გადაჭედილი იყო.
პრობლემა თბილისის ყველა უბნის მაცხოვრებლებს აქვთ, თუმცა ის განსაკუთრებით მწვავეა დიდ დიღომში, სადაც არც მეტროა და არც საკმარისი რაოდენობის სხვა საზოგადოებრივი ტრანსპორტი. გართულებული გადაადგილების მძიმე შედეგზე წერს ერთ-ერთი ინტერნეტმომხმარებელი გოგონა, რომელმაც ვინაობის გამხელა არ ისურვა.
როგორც ის ამბობს, ტრანსპორტირების პრობლემის გამო დროულად ვერ მივიდა შეუძლოდ მყოფ დედასთან და ქალი ახლა რეანიმაციულ განყოფილებაშია:
"ახლა რეანიმაციის კარებთან ვზივარ თოდუაში და ექიმის 3-საათიანი დასკვნის მოლოდინის შემდეგ, გადავწყვიტე ამ პოსტის დაწერა. მადლობა მინდა გადაგიხადო შენ, "ბატონო" მერო! მადლობა კახა კალაძე, მადლობა შენი ტაქსების ახალი რეგულაციებისთვის!
მადლობა, რომ ზრუნავ ქალაქის იერსახეზე და "ესთეტიკურ სილამაზეზე". მადლობა, რომ მოსპე "ფერადი" ტაქსისტების პარპაში. მადლობა!!! დღეს მოულოდნელად დედამ დამირეკა - შეუძლოთ ვარო და გთხოვ, გამოდიო.
გიჟივით გავვარდი ქუჩაში (დედას გულის პრობლემები აქვს), გამოვვარდი პეტრიწის ქუჩაზე, დავდექი ტაქსის გასაჩერებლად საბურთალოს ქუჩის მიმართულებით. ვერც ერთი შენი ტაქსი ვერ ვნახე დიდ დიღომში! ვიდექი ასე, ცხოვრებაში პირველად ვტიროდი სასოწარკვეთილი! როგორც იქნა, 20 წუთის მერე გამოჩნდა და გამიჩერა თეთრმა ტაქსმა - პასუხი იყო: საბურთალოზე არ მივდივარო. გავატარე. გამიჩერა მეორემ - სხვაგან მივდივარო...
ასე ვიდექი დაახლოებით 50 წუთი და უსუსური ბავშვივით ვტიროდი! ბოლოს ვიღაც ღვთისნიერმა "არალეგალურმა" გამიჩერა. გზად ეტყობა შემატყო ტელეფონის საუბრით, რომ მაგრად ვნერვიულობ მეჩქარება, წინ საცობია და მგზავრობის ფულიც (!) კი არ გადამახდევინა! მიუხედავად ჩემი დაჟინებული თხოვნისა!
პ.ს. ცხოვრება ბუმერანგია, ბატონო მერო და ეს ბუმერანგი აუცილებლად შემოგიტრიალდება!“ - წერს დიდი დიღმის ფეისბუქჯგუფში უბნის ერთ-ერთი მაცხოვრებელი.
AMBEBI.GE პოსტის ავტორს დაუკავშირდა, მისი თქმით, შემთხვევა გუშინ პიკის საათში მოხდა, როცა პრაქტიკულად შეუძლებელი იყო საზოგადოებრივი ტრანსპორტით სარგებლობა.
"დაახლოებით 18:30 წუთზე მივედი დედასთან. უფროსი და მყავს, შშმ პირია და ფიზიკურად ვერ გამოიძახებდა სასწრაფოს, ვერც დედა მიატოვებდა მას და ვერ წავიდოდა საავადმყოფოში. დიდ დიღომს ძალიან უჭირს ტრანსპორტში. პიკის საათებში ვერ ახვალ, ახლა ეს ტაქსის პრობლემაც დაგვემატა“ - გვიხსნის ახალგაზრდა ქალი.
AMBEBI.GE ტრანსპორტის გაჩერებაზე დიდი დიღმის რამდენიმე მაცხოვრებელსაც ესაუბრა. ისინი ამბობენ, რომ გაუსაძლისი მდგომარეობაა და მერიას სწრაფი რეაგირებისკენ მოუწოდებენ.
დავითი, 47 წლის: "40 წუთია გაჩერებაზე ვდგავარ, ვერ ავედი ვერც ერთ ავტობუსში, ასე რამდენ ხანს უნდა გაგრძელდეს?! ყოველდღე, დღის თითქმის ნებისმიერ მონაკვეთში ასეთი მძიმე სიტუაციაა, თუ გაგიმართლებს და როგორმე ახვალ, მერე იქ იგუდები, კი არის კონდიციონერი ამ ახალ ავტობუსში, მაგრამ როცა ამდენი ხალხი მგზავრობს, არაფერი აღარ შველის, მორიგეობით ვსუნთქავთ. მერე ერთი საათი საცობში ვდგავართ, ის, რაც თბილისის საზოგადოებრივ ტრანსპორტში ხდება, არაადამიანურია!"
თამარი, 19 წლის: "სტუდენტი ვარ და მაღლივში დავდივარ ყოველდღე. სამი ხაზი მუშაობს ამ მიმართულებით, მაგრამ არ არის საკმარისი. 21 ნომერ ავტობუსში ვახერხებ ხოლმე ასვლას, მაგრამ საათნახევარი ვარ გზაში, ყოფილა შემთხვევა, ორი საათიც დამჭირვებია. ცალ ფეხზე რომ დგახარ ორი საათი, წარმოგიდენიათ?! ისეთ მდგომარეობაში მივდივარ უნივერსიტეტში დაღლილი და ძალაგამოლეული, მერე აღარც სწავლის და არაფრის თავი არ მაქვს".
თათია 36 წლის: "რა უნდა გითხრათ, ამას ცხოვრება არ ჰქვია, რა ვქნათ, არ ვიმუშაოთ?! არ წავიდეთ სამსახურებში?! აღარ ვიცი როგორ მოვიქცე, ადრე ხანდახან მაინც ვახერხებდი სამსახურში ტაქსით მისვლას, კანდელაკზეა ჩემი ოფისი და გაგარინამდე ხუთ ლარად გავდიოდი, ახლა ჯერ ეს ტაქსი იშვიათი გახდა და მერე მეორე, ორმაგს ითხოვს. ამხელა ფული ტაქსიში როგორ გადავიხადო, როცა ხელფასი 700 ლარი მაქვს?! დახმარებას ვითხოვთ, თუ სწრაფად არ მოგვარდება, მერია საპროტესტო აქციებს მიიღებს!"
ლაშა, 27 წლის: "მანქანას ვიყიდი და მეც ჩავდგები ამ ჩემი მანქანით საცობში, მაინც მთელ ცხოვრებას საცობში ვატარებ და თან გაჭყლეტილი ამ ავტობუსში, კომფორტულად მაინც ვიქნები. შეუძლებელია ასე გაგრძელება".
თბილისის მერი კახა კალაძე ყოველთვის აღნიშნავს, რომ საზოგადოებრივი ტრანსპორტის მოწესრიგება მერიის მთავარი ამოცანაა. ამაზე დედაქალაქის პირველმა პირმა ერთ-ერთი ბოლო ვიდეომიმართვისასაც ისაუბრა:
"ვმუშაობთ იმაზე, რომ ზოგადად, ტრანსპორტის თემა ქალაქში იყოს მოწესრიგებული, ასევე ძალიან დიდი ყურადღება ეთმობა მეტროს, მეტროს ვაგონების რეაბილიტაციას, განახლებას, მეტროს მოდერნიზებას, ეს არის ის მნიშვნელოვანი საკითხები, რითაც ჩვენ გვინდა საზოგადოებრივი ტრანსპორტის თემა მოვაგვაროთ.
რა თქმა უნდა, როდესაც ვსაუბრობთ საზოგადოებრივ ტრანპორტზე, ვსაუბრობთ ავტობუსებზე, გვერდს ვერ ავუვლით, მიკროავტობუსების საკითხს, რომლებსაც ძალიან ბევრი ადამიანი გადაჰყავს ქალაქში. მიკროავტობუსების დიდ რაოდენობას, ისევე, როგორც ყვითელ ავტობუსებს, ფაქტობრივად რესურსი ამოწურული აქვთ და სერიოზულ პრობლემას წარმოადგენს ჰაერის დაბინძურების თვალსაზრისით, პრობლემას წარმოადგენს ასევე ამ მიკროავტობუსებით გადაადგილება. შეიძლება ვთქვათ, რომ რესურსი ამოწურული აქვთ.
შესაბამისად, კომპანიას დავავალდებულებთ, რომ აუცილებლად ჩაანაცვლონ ისინი. კომპანიასთან რამდენჯერმე გვქონდა უკვე კომუნიკაცია და ისინი წინააღმდეგები არ არიან. არის რამდენიმე შეთავაზება, ერთი ეს არის „ფორდის“ ახალი მიკროავტობუსების შემოყვანა და მეორე, საქართველოში წარმოების დაწყება, რასაც ჩვენ მივესალმებით, ეს იქნება ყველანაირად ადაპტირებული, შიგნითაც საკმაოდ კომფორტული, აღჭურვილი კონდიცირების სისტემით, გათბობით, იქნება 17 დასაჯდომი ადგილი და მგონია, რომ ძალიან კომფორტული იქნება და თუ ეს კომპანია მიკროავტობუსების აქ წარმოებას მოახერხებს, ნამდვილად მისასალმებელი იქნება" - აღნიშნა კალაძემ რამდენიმე დღის წინ ვიდეოჩართვაში.
ტაქსების რეგულაციების გადახედვისკენ მერიას ექსპერტებიც მოუწოდებენ, "საქართველოს ტრანსპორტისა და გზების ასოციაციის" თავმჯდომარე დავით მესხიშვილი ამბობს, რომ აუცილებელია ტაქსების რეგულაციის გადახედვა, რადგან ტაქსით მომსახურება გაძვირებულია, შესაბამისად, დატვირთულია საზოგადოებრივი ტრანსპორტი, რომელიც მგზავრთნაკადის გაზრდისთვის მზად არ არის:
"ვეუბნებოდით თბილისის მერიას, რომ ტაქსების რეფორმამ არ უნდა დაასწროს საზოგადოებრივი ტრანსპორტის განვითარებას. მოხდა ისე, რომ ერთ დროს იაფიანი ტაქსი გახდა ძვირი, შესაბამისად, მგზავრთა ნაკადი გაიზარდა ავტობუსების და მეტროს მიმართულებით და ეს ორი უკვე მზად არაა გაზრდილი მგზავრთნაკადის მისაღებად.
მე ვფიქრობ, რომ ეს არის მორგებული გარკვეულ მსხვილ ბიზნესზე. რამდენიმე კომპანია შეიძლება ფიქრობდეს თეთრი ავტომობილების შემოყვანას, ეს არ არის ფაქტებით დადასტურებული, თუმცა გაჩნდა მოთხოვნა, რაც იმას ნიშნავს, რომ ჩვენ უნდა ველოდოთ მსხვილი კომპანიების შემოსვლას" - განაცხადა მესხიშვილმა.
ავტორი: ხატია ვარდოსანიძე
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები: რა ხდებოდა 2 ძლიერი მიწისძვრის დროს მიანმარში? - დაღუპულთა რაოდენობა 1 000-ს გასცდა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
