7
ივლისიდღის ზოგადი ასტროლოგიური პროგნოზი
ფოთში, 79 წლის მასწავლებელმა ნატრული ტაბიძემ საპენიო ასაკის პრაქტიკოსი პედაგოგებისთის სახელმწიფოს მიერ შეთავაზებულ ჯილდოზე უარი განაცხადა და საგნობრივ გამოცდაზე უმაღლესი შეფასება - 10 ქულა მიიღო.
განათლების სამინისტროს ახალი რეფორმის მიხედით, თუ ღვაწლმოსილი პედაგოგი უარს იტყვის პროფესულ საქმიანობაზე, მას ორი წლის ჯამური ხელფასი ერთდროულად გადაეცემა, წინააღმდეგ შემთხვევაში კი, სტატუსის ასამაღლებლად, შესაბამისი გამოცდა უნდა გაიაროს.
ნატრული ტაბიძე პედაგოგიურ მოღვაწეობას 1964 წლიდან ეწევა. ის ქიმიის მასწავლებელია. 37 წელია, ფოთის თეოფანე დავითაის სახელობის N1 საჯარო სკოლაში მუშაობს. მრავალი თაობის აღმზრდელი, დამსახურებული პედაგოგი არაერთი ჯილდოსა და წოდების მფლობელია.
ნატრული ტაბიძე AMBEBI.GE-სთან საუბარში განმარტავს, თუ რატომ განაცხადა უარი სახელმწიფოს მიერ შეთავაზებულ ჯილდოზე:
"ეს გადაწყვეტილება ორი მიზეზის გამო მივიღე. პირველი - მე პირობა დავდე ჩემი სათაყვანებელი ქიმიის მასწავლებლის თინა ჭოჭუას წინაშე. ის ამავე სკოლის პედაგოგი იყო. მან ქიმიის ლაბორატორიის უნიკალური კაბინეტი მოაწყო, რომელსაც მოგვიანებით მისივე სახელი მიენიჭა.
სიცოცხლის ბოლოს თინა მასწავლებელმა დამიბარა და მითხრა: "არ გაწირო და არ დატოვო ლაბორატორიაო". მაშინ უპასუხოდ დავტოვე, თუმცა გარდაცვალების შემდეგ, დაკრძალვის დღეს, სკოლის წინ დასვენებულ მის ცხედართან დავდე პირობა - ვიდრე ფეხზე ვდგავარ არ გავწირავ და არ დავტოვებ ლაბორატორიას.
სწორედ ამიტომ, მე უარი ვთქვი სახელმწიფოს მიერ შემოთავაზებულ ჯილდოზე და მიუხედავად ასაკისა გამოცდაზე გავედი, რომელიც წარმატებით ჩავაბარე. იცით, რომ ყველაფერი წინ მიდის, სიახლეებია. მინდა ის რაც არის, უფრო ლამაზად შევფუთო, თანამედროვე ხასიათი ჰქონდეს და მეტად გამოყენებადი იყოს.
აუცილებელია, ლაბორატორიის ძველი ინვენტარის შეცვლა, რაც ამჟამად არსებული თვითნაკეთი და ქარხნული წარმოების ხელსაწყოების უფრო თვალსაჩინოდ და ესთეტიკურად წარმოჩენას უზრუნველყოფს. სკოლას ფინანსურად ამის შესაძლებლობა არ აქვს. ამიტომ, წლებია ვეძებ სპონსორს, მაგრამ ჯერჯერობით უშედეგოდ, ალბათ გამოჩნდება ღვთისნიერი ადამიანი.
ბევრი გეგმა მაქვს, რომელსაც ჩემს საოცნებო გეგმას ვუწოდებ და იმედს ვიტოვებ, რომ ამისრულდება. ეს კი მეორე მიზეზია, რის გამოც სკოლა არ დავტოვე" - აცხადებს ნატრული ტაბიძე.
ის პედაგოგებს ურჩევს მოსწავლეებთან ტაქტიანები, შემწყნარებლები და გულწრფელები იყნენ.
"მასწავლებელი ყოველ დღე უნდა სწავლობდეს და ახსოვდეს, თუ ბედავს სწავლებას, თავადაც არასდროს მიატოვოს სწავლა. სანამ უფალი ინებებს და სანამ ჯანმრთელობა მექნება სკოლას არ დავტოვებ. მხედველობა, სმენა ნორმალური მაქვს. პედაგოგიური მოღვაწეობა ჯერ კიდევ შემიძლია, დავრდომილი არ ვარ, საამისო ენერგია მაქვს" - აცხადებს ნატრული ტაბიძე.
ავტორი: მაია ძაგანია
