25
მარტიდღის ზოგადი ასტროლოგიური პროგნოზი
უინსტონ ჩერჩილის ურთიერთობა უახლოეს თანამებრძოლთან, ირლანდიელ ბრენდენ ბრეკენთან დღემდე საიდუმლოებით არის მოცული.
ბრეკენი 1901 წელს დაიბადა. მამა მალე გარდაეცვალა. 1908 წელს დედამ ოჯახი დუბლინში გადაიყვანა საცხოვრებლად, სადაც ბრენდენი წმინდა პატრიკის ეროვნულ სკოლაში მიაბარა სასწავლებლად. შვილის ცუდი ყოფაქცევით შეწუხებული ჰანა ბრეკენი იძულებული გახდა, ბრენდენი სიდნეიში გაეშვა ბიძაშვილთან, რომელიც მღვდელი იყო. ბრეკენი ავსტრალიაში მოხეტიალე ცხოვრებას ეწეოდა, ბევრს კითხულობდა და განათლება დამოუკიდებლად მიიღო.
ლივერპულში 1919 წელს დაბრუნდა და მასწავლებლად დაიწყო მუშაობა. ამტკიცებდა, რომ სიდნეის უნივერსიტეტი ჰქონდა დამთავრებული. მოგროვებული თანხით შეძლო, სედბერგის საჯარო სკოლაში დაეწყო სწავლა - მან განაცხადა, რომ მშობლები ავსტრალიაში ხანძარმა იმსხვერპლა და ობოლი იყო.
რამდენიმე წლის შემდეგ საცხოვრებლად ლონდოში გადავიდა და გამოცემისთვის Illustrated Review დაიწყო წერა. პოლიტიკურ-სოციალური მოვლენების გაშუქებამ ბრეკენს საშუალება მისცა, ბევრ ცნობილ ადამიანს შეხვედროდა.
1923 წელს გამოცემის Observer რედაქტორმა ბრეკენი უინსტონ ჩერჩილს გააცნო, რომელიც ლესტერში არჩევნებში მონაწილეობას გეგმავდა და ბრეკენმა მას შესთავაზა, საარჩევნო კამპანიის მენეჯერობა მისთვის მიენდო. ჩერჩილი და ბრეკენი სულ მალე იმდენად დაახლოვდნენ, რომ მათ შესახებ ჭორები აგორდა - ერთ-ერთი ჭორის თანახმად, ბრეკენი ჩერჩილის ბიოლოგიური შვილი იყო. ბრენდენი არ მოსწონდა ჩერჩილის ცოლს, კლემენტინას და მათ მეგობრობას ყოველთვის ეწინააღმდეგებოდა.
ბევრი ახლაც მიიჩნევს, რომ ბრეკენის ბიოგრაფიული ცნობები გამოგონილია და მან კვალის ასარევად გამოიყენა. ოფიციალური ცნობები მისი დაბადების თუ განათლების შესახებ არ არსებობს.
ამასობაში კი ბრეკენმა ჟურნალისტიკაში წარმატებული კარიერა ააწყო. ის წლების განმავლობაში რამდენიმე ცნობილი გამოცემის რედაქტორი იყო - დააარსა გავლენიანი Financial Times. მოგვიანებით კი პოლიტიკაში აქტიურად ჩაება - ის კონსერვატიული პარტიის წევრი იყო, მეორე მსოფლიო ომის პერიოდში ეკავა ინფორმაციის მინისტრის თანამდებობაც.
2015 წელს ეკრანებზე გამოვიდა დოკუმენტური ფილმი ბრეკენის შესახებ, სადაც ავტორებმა ფოტოების, ინტერვიუების, უიშვიათესი საარქივო კადრების საშუალებით ჩერჩილის უახლოესი მეგობრის შესახებ მანამდე უცნობი დეტალების შესახებ უამბეს მაყურებელს. პროდიუსერი ადრიან ბრეკენია, რომელიც ბრენდენის ოჯახის ნათესავია.
„ჩერჩილთან პირველივე შეხვედრის შემდეგ ისინი უახლოეს მეგობრებად იქცნენ. 1920-იან წლებში ლონდონში ბევრი ადამიანი ამტკიცებდა, რომ ბრეკენი ჩერჩილის უკანონო შვილი იყო. ეს ჭორი არასოდეს გამქრალა და უფრო მეტიც - არც ჩერჩილმა და არც ბრეკენმა ინფორმაცია არცერთხელ უარყვეს,“ - ამბობს პროდიუსერი.
