ვინ არის ქალი, რომელიც დონალდ ტრამპმა საქართველოში აშშ-ს ელჩად წარადგინა

აშშ-ის პრეზიდენტმა დონალდ ტრამპმა საქართველოში სრულუფლებიანი ელჩის პოზიციაზე კელი დენიანის კანდიდატურა წარადგინა.

დენიანი ამჟამად აშშ-ის საზღვაო ძალების პოლიტიკური მრჩეველია ევროპასა და აფრიკაში. მას დიპლომატიურ სამსახურში მუშაობის 25-წლიანი გამოცდილება აქვს.

დენიანს ელჩის მოადგილის პოსტები ეკავა იტალიაში, კოსოვოში, ავღანეთსა და თურქეთში. ბოლო სამი წლის განმავლობაში ამერიკელი დიპლომატი სწორედ იტალიის მისიაში მუშაობდა.

დენიანმა იურიდიული განათლება სამხრეთ კალიფორნიის უნივერსიტეტში მიიღო. ამასთან, აქვს ხარისხი ჟურნალისტიკაში. ინგლისურის გარდა ამერიკელი დიპლომატი საუბრობს 4 ენაზე: იტალიურ, ფრანგულ, თურქულ ენებზე და ურდუზე.

საქართველოში აშშ-ის ელჩის პოსტი 2018 წლის მარტიდან ვაკანტური იყო. 2015 წლიდან 2018 წლამდე აშშ-ის ელჩის თანამდებობას საქართველოში იან კელი იკავებდა.

კელი დენიანის კანდიდატურას მხარი ამერიკის სენატმა უნდა დაუჭიროს.