ბიძინა ივანიშვილმა გიორგი გახარია პრემიერის პოსტზე წარადგინა

„ქართულმა ოცნებამ“ პრემიერ-მინისტრის პოსტზე შს მინისტრი გიორგი გახარია წარადგინა. შესაბამისი განცხადება პარტიის ოფისში რამდენიმე წუთის წინ თავად „ქართული ოცნების“ თავმჯდომარე ბიძინა ივანიშვილმა გააკეთა.

გიორგი გახარიას მთავრობის მეთაურად დანიშვნის თაობაზე გადაწყვეტილება დილიდან „ქართული ოცნების“ პოლიტსაბჭოსა და უმრავლესობის სხდომებზე შეთანხმდა.

როგორც ივანიშვილმა აღნიშნა, გუნდს გახარიას კანდიდატურა თავად შესთავაზა:

„დღეს დილით გვქონდა „ქართული ოცნება-დემოკრატიული საქართველოს“ პარტიის პოლიტსაბჭო. პოლიტსაბჭოზე მე, როგორც პარტიის თავმჯდომარემ წარვადგინე ახალი კანდიდატურა პრემიერ-მინისტრის, გიორგი გახარიას სახით. მივიღეთ სრული მხარდაჭერა. ამის შემდგომ უმრავლესობასთან გვქონდა შეხვედრა და იქაც კითხვებიც არ დასმულა და ეს არის ჩვენი არჩევანის ობიექტური შეფასება.

თქვენც და საზოგადოებაც კარგად იცნობს გიორგი გახარიას. მე ვფიქრობ, მან საკუთარი მოღვაწეობით, დაწყებული ბიზნესომბუდსმენობიდან, შემდგომ ის გახლდათ ეკონომიკის მინისტრი, შემდეგ კი შს მინისტრი, ღირსეულად დაიმსახურა ამ პოსტზე მისი წარდგენა და მე ვფიქრობ, მას პარლამენტი აუცილებლად დაამტკიცებს“, - განაცხადა ბიძინა ივანიშვილმა.

VIDEO: რა სიტყვებით წარადგინა ივანიშვილმა გახარია პრემიერად

პრემიერის პოსტი მამუკა ბახტაძემ გუშინ დატოვა. ვრცელ წერილში, რომელიც გადამდგარმა პრემიერმა "ფეისბუქზე" გამოაქვეყნა, აღნიშნა, რომ "მისია ამ ეტაპისათვის შეასრულა" და თანამდებობას ტოვებდა.

შეგახსენებთ, შს მინისტრ გიორგი გახარიას გადადგომას საზოგადოების ნაწილი 76-ე დღეა ითხოვს 20-21 ივნისის აქციის დარბევის შემდეგ. "ოცნების" პოლიტსაბჭოს მიმდინარეობის დროსაც, „ქართული ოცნების“ ცენტრალურ ოფისთან, აქცია „სირცხვილიას“ წარმომადგენლები იმყოფებოდნენ. აქციის მონაწილეები აპროტესტებენ გიორგი გახარიას პრემიერად წარდგენას.

როგორც „სირცხვილიას“ ერთ-ერთმა ორგანიზატორმა გიგა მაქარაშვილმა ჟურნალისტებს განუცხადა, იმ შემთხვევაში, თუ გიორგი გახარია მთავრობის მეთაურის თანამდებობას დაიკავებს, „ქართული ოცნების“ წინააღმდეგ ტემპერატურა კიდევ უფრო მოიმატებს.

ფოტო: გიორგი ჟამერაშვილი