9
ივლისიდღის ზოგადი ასტროლოგიური პროგნოზი
განათლების, მეცნიერების, კულტურისა და სპორტის მინისტრის პირველ მოადგილედ ბადრი მაისურაძე დაინიშნა. მინისტრის მოადგილის პოსტი მას შემდეგ იყო ვაკანტური, რაც ივლისში თანამდებობა დატოვა მიხეილ გიორგაძემ და კერძო სექტორში გადაინაცვლა.
ბადრი მაისურაძე ქართველი დრამატული ტენორი, წლების განმავლობაში მოღვაწეობდა რუსეთში, მოსკოვის დიდ თეატრში. 2016 წლის ნოემბრიდან დღემდე თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრის სამხატვრო ხელმძღვანელის თანამდებობას იკავებდა.
2019 წელს მისი თაოსნობით ჩაეყარა საფუძველი საქართველოში ვერდის ფესტივალს.
„ბადრი მაისურაძე გახლდათ ბუსეტოს ვერდის სახელობის თეატრის, პუჩინის ფესტივალის, კორეის ნაციონალური ოპერის, ჰონგ-კონგის ოპერის, სანკტ-პეტერბურგის მიხაილოვსკის სახელობის თეატრის კონსულტანტი, ასევე, ხელმძღვანელობდა ART FESTIVAL-ის (პრაღა და უმბრია) და მსტისლავ როსტროპოვიჩის სახელობის საერთაშორისო მუსიკალურ ფესტივალებს.
ბადრი მაისურაძე ისეთი პრესტიჟული საერთაშორისო კონკურსების ჟიურის წევრია, როგორებიცაა: ბუსეტოს საერთაშორისო კონკურსი „ვერდის ხმები“, პარიზის ვინჩენცო ბელინის სახელობის კონკურსი, გალინა ვიშნევსკაიას სახელობის ვოკალისტთა კონკურსი, მელბურნის ვოკალისტთა საერთაშორისო კონკურსი, საოპერო მუსიკის კონკურსი „ჯოვანი მარტინელი-აურელიანო პერტილე“ (ჟიურის თავმჯდომარე). იგი თბილისის ვოკალისტთა საერთაშორისო კონკურსის OPERA CROWN ჟიურის თავმჯდომარეა.
იგი არაერთი პრესტიჟული საერთაშორისო კონკურსის გამარჯვებულია, მათ შორისაა, ფრანცისკო ვინიასის სახელობის ვოკალისტთა საერთაშორისო კონკურსი (ესპანეთი) და იური ბიორლინგის სახელობის საერთაშორისო კონკურსი (შვედეთი). ბადრი მაისურაძე მეგობრობის საერთაშორისო ორდენის კავალერია.
ბადრი მაისურაძის საერთაშორისო კარიერა 1993 წელს დაიწყო - ლიეჟის სამეფო ოპერის თეატრში, ხოლო მას შემდეგ საქმიანობდა მსოფლიოს წამყვან თეატრებში, მათ შორისაა მილანის La Scala, ვენის Staatsoper, ბერლინის Deutsche Oper, ფლორენციის Teatro Comunale, მადრიდის Teatro Real, ნეაპოლის Teatro di San Carlo, პალერმოს Teatro Massimo, ბარსელონას Gran Teatre del Liceu, დრეზდენის Semperoper, პარიზის ნაციონალური ოპერა, სანკტ-პეტერბურგის მარიას თეატრი, სტოკჰოლმის სამეფო ოპერის თეატრი, მონპელიეს ნაციონალური ოპერის თეატრი, მოსკოვის დიდი თეატრი, კანადის ოპერის თეატრი, ოპერა ავსტრალია, ლისაბონის Teatro Nacional de São Carlos, მალტის სამეფო ოპერის თეატრი, ისრაელის ოპერა, ტულონის ოპერის თეატრი, ახალი ზელანდიის ოპერა, კეიპტაუნის ოპერა და სხვა.
2004 წელს ბადრი მაისურაძემ მონაწილეობა მიიღო მილანის La Scala-ს საოპერო სეზონის გახსნაში. ხანგრძლივი და წარმატებული კარიერის მანძილზე მას თანამშრომლობა აკავშირებს ცნობილ დირიჟორებთან, მათ შორისაა სეიჯი ოძავა, ზუბინ მეტა, დანიელ ორენი, ანტონიო გუადანიო, მარჩელო ვიოტი, მაურიციო ბარბაჩინი, პეტერ ფერენეცი, კარლო რიცი, არვო ვოლმერი, ალექსანდრ ვედერნიკოვი, მაურიციო არენა, გარსია ნავარო, მაურიციო ბენინი, ჯორჯო მორანდი, ნელო სანტი, ლოურენს ფოსტერი, ჯანსუღ კახიძე, გივი აზმაიფარაშვილი, ოდისეი დიმიტრიადი და ასე შემდეგ.
ბადრი მაისურაძემ განათლება საქართველოს შოთა რუსთაველის თეატრისა და კინოს სახელმწიფო უნივერსიტეტსა და თბილისის ვანო სარაჯიშვილის სახელობის სახელმწიფო კონსერვატორიაში მიიღო. მოგვიანებით სწავლა განაგრძო მილანსა და მოსკოვში. ფლობს ქართულ, იტალიურ, რუსულ და ინგლისურ ენებს“, - აღნიშნულია სამინისტროს მიერ გავრცელებულ ინფორმაციაში.
