ამაზონის ტყეებში ხანძარს 44 000 ჯარისკაცი ჩააქრობს - რა შეთანხმებას განიხილავენ "დიდი შვიდეულის" სამიტზე

ჩრდილო ამაზონის რეგიონში, ტროპიკულ ტყეებში მძვინვარე ხანძარს დაახლოებით 44 000 სამხედრო მოსამსახურე შეებრძოლება, - ამის შესახებ ინფორმაციას ბრაზილიის თავდაცვის სამინისტრო ავრცელებს.

სამინისტროს მიერ გავრცელებულ ვიდეოში ჩანს თვითმფრნავი C-130 Hercules, რომელიც ტყის ხანძარს ქალაქ პორტო ველჰოსთან ახლოს ებრძვის.

კოსმოსური კვლევის ეროვნული ინსტიტუტის მიერ გავრცელებული ოფიციალური ინფორმაციის თანახმად, მიუხედავად იმისა, რომ ბრაზილიის მთავრობამ ხანძარსაწინააღმდეგო ოპერაციები დაიწყო, გასული შაბათ-კვირის განმავლობაში ცეცხლის 1 130 ახალი კერა წარმოიქმნა. საერთო ჯამში კი ამაზონის ტროპიკულ ტყეებში დაახლოებით 80 000 ხანძარია რეგისტრირებული, რაც 2013 წლის შემდეგ ყველაზე მაღალი მაჩვენებელია.

„დიდი შვიდეულის“ სამიტზე მსოფლიო ლიდერები ამაზონის ტყის ხანძრების საწინააღმდეგო ზომებზე შეთანხმებასთან ახლოს არიან. როგორც საფრანგეთის პრეზიდენტმა ემანუელ მაკრონმა განაცხადა, შეთანხმება ბრაზილიისთვის ტექნიკური და ფინანსური დახმარების შესახებ თითქმის მიღწეულია.

მისივე თქმით, მსოფლიო ლიდერები ასევე თანხმდებიან, რომ დაეხმარონ იმ ქვეყნებს, რომლებიც ხანძრებმა მნიშვნელოვნად დააზარალა.

„ჩვენი გუნდი ამაზონის რეგიონის ქვეყნებს უკავშირდება, ასე რომ, ჩვენ შეგვიძლია საბოლოოდ შევათანხმოთ ძალიან კონკრეტული ვალდებულებები, რაც ტექნიკური რესურსებსა და დაფინანსებას მოიცავს“, - აღნიშნა მაკრონმა.

ამასთან, დიდი ბრიტანეთის პრემიერმა ბორის ჯონსონმა განაცხადა, რომ ბრიტანეთი მზად არის 10 მილიონი ფუნტის გამოყოფისთვის.

შეგახსენებთ, „დიდი შვიდეულის“ სამიტის ფარგლებში ერთმანეთს აშშ-ის, იაპონიის, საფრანგეთის, გერმანიის, იტალიის, ბრიტანეთისა და კანადის ლიდერები საფრანგეთის ქალაქ ბიარიცში ხვდებიან.