ბრაზილიაში ამაზონის ტყეები იწვის. გარემოს კვლევის ეროვნული ინსტიტუტის მონაცემებით, გასულ წელთან შედარებით ველური ხანძრის მასშტაბი 84%-ით არის გაზრდილი.
BBC წერს, რომ ამაზონის ტროპიკული ტყე მსოფლიოში უდიდესია და ძალიან მნიშვნელოვან როლს ასრულებს გლობალური დათბობის პროცესის შენელებაში. ტყეში სამ მილიონამდე სახეობის მცენარე და ცხოველია.
კონსერვაციონისტები მომხდარში ბრაზილიის პრეზიდენტს ადანაშაულებენ. მათი მტკიცებით, ჟაირ ბოლსონარომ ფერმერებს მოუწოდა, ხეები გაეჩეხათ. მეცნიერები ამბობენ, რომ ტროპიკულ ტყეებში მცენარეულმა საფარმა ბოლსონაროს პრეზიდენტობის პერიოდში მნიშვნელოვნად იკლო.
Foxnews-ის ინფორმაციით, ბრაზილიის უდიდესი ქალაქი, სან-პაულუ შავ ღრუბელში გაეხვია და დღისით, რამდენიმე საათის განმავლობაში ქალაქში „ღამე იყო“.
ადგილობრივი მოსახლეობა სოციალურ ქსელებში წერს, რომ სან-პაულუში შავი წვიმა მოდის, სუნთქვა კი, პრაქტიკულად, შეუძლებელია.
#sp2 olha a água da chuva de ontem parece aguarde café pic.twitter.com/lZVFkNUH1e
— Olavo Washington (@OlavoWashington) August 20, 2019
ველური ხანძარი მშრალ სეზონზე ბრაზილიაში ხშირად ჩნდება, თუმცა ტყეების გაჩეხვამ სავალალო შედეგები მოიტანა. გარემოს კვლევის ეროვნული ინსტიტუტის ინფორმაციით, იანვარი - აგვისტოს პერიოდში 74 ათასი ხანძრის კერა დაფიქსირდა. მხოლოდ გასული კვირის განმავლობაში ბრაზილიაში 9500 კერა გაჩნდა.
