"ჩვენი ამბავი, თითქოს სახლში დაბრუნებას ჰგავს, ბავშვობაში" - როგორ დაიწყო ლიკა ევგენიძისა და ნიკა კოჩაროვის სიყვარულის ისტორია

საფრანგეთი, გერმანია, საბერძნეთი... და ცოტა ხნის წინ ინდონეზია... ტელეწამყვანი ლიკა ევგენიძე და მუსიკოსი ნიკა კოჩაროვი "ინსტაგრამსა" და "ფეისბუქზე" რომანტიკულ ფოტოებს ხშირად აქვეყნებენ. წყვილი, რომლის რომანის შესახებ ორი წლის წინ გახდა ცნობილი, უცხოეთში ხშირად მოგზაურობს. ისინი პრესასთან პირად ცხოვრებაზე არ საუბრობენ.

• ლიკა ევგენიძე და ნიკა კოჩაროვი ბალიზე - რომანტიკული დასვენების ამსახველი ფოტოები

ლიკა ტელეწამყვანი და მოდელია. რამდენიმე წლის წინ მიხეილ სააკაშვილის ნათესავზე, ნიკა ალასანიაზე იყო დაქორწინებული და ამერიკაში ცხოვრობდა. მასთან ლიკას ორი შვილი ჰყავს, ქალ-ვაჟი - ანა-სოფია და ალექსანდრე.

მეუღლეს დაშორებულია ასევე ნიკა კოჩაროვიც, მუსიკოსსაც ყოფილი ქორწინებიდან ორი შვილი ჰყავს.

ცოტა ხნის წინ ლიკა ევგენიძე ჟურნალ "სითის" ფურცლებზე მოხვდა და ინტერვიუში პირად ცხოვრებაზე მოკლედ ისაუბრა:

- ლიკა, დროა ამ ისტორიაში ნიკა კოჩაროვი შემოვიყვანოთ. როდის გაიცანი?

- შორიდან ადრეც ვიცნობდი, გადაცემებში იყო ჩვენთან რამდენჯერმე. უბრალოდ ისე, გამარჯობით ვიცნობდი, ცხადია, ვიცოდი მისი მუსიკაც. მერე უცნაური ამბავი მოხდა: მამამ კომპოზიცია დაწერა და გადაწყვიტა, რომ მისი სიმღერა მე და ნიკას ერთად გვემღერა.

- მერე?

- მერე არაფერი, ეს სიმღერა აღარ ჩაიწერა.

- და თქვენ შეგიყვარდათ ერთმანეთი, მომიყვები თუ ვერა?

- ვერა. ძნელია აღწერო და მოყვე ის, რაც ორ ადამიანს შორის ხდება, რა კოსმოსური ენერგია ახვედრებს ამ ადამიანებს ერთმანეთს. ერთი შემიძლია ვთქვა, რომ ეს ყველაფერი ახლოა ჩემთან, ჩემი ოჯახიდან გამომდინარე. ირგვლივ სულ ხელოვანი ხალხი მყავდა, მთელი ბავშვობა ისე ვერ ვიძინებდი, თუ სახლში სიჩუმე იყო. სულ მუსიკის ხმა უნდა ყოფილიყო. ჩემი და ნიკას ამბავი, თითქოს სახლში დაბრუნებას ჰგავს, ბავშვობაში.

წყარო: "სითი"