თეონა ცხომელიძემ "რუსთავი 2" დატოვა - "ვწუხვარ, რომ ჩემი მეგობრები და კოლეგები კრიზისულ დროს მივატოვე, თუმცა..."

"კურიერის" ჟურნალისტმა თეონა ცხომელიძემ ტელეკომპანია "რუსთავი 2" დატოვა. ცხომელიძე "ფეისბუქის" პირად გვერდზე წერს, რომ ეს გადაწყვეტილება რამდენიმე თვის წინ მიიღო, თუმცა მისი წასვლა ტელეკომპანიაში ბოლო დროს განვითარებულ მოვლენებს დაემთხვა.

"გავანთავისუფლე ჩემი "სწენკა" ნიუსრუმში.

13-წლიანი მუშაობის, უამრავი დროის, ემოციის და ენერგიის დახარჯვის შემდეგ წამოვედი ადგილიდან, რომელიც ოჯახის შემდეგ ყველაზე მეტად მიყვარდა.

ვწუხვარ, რომ ჩემი მეგობრები და კოლეგები კრიზისულ დროს მივატოვე, თუმცა მათ კარგად იციან - გადაწყვეტილება გაცილებით ადრე, ივნისში მივიღე.

სენტიმენტებს ჩემთვის დავიტოვებ, მადლობა რუსთავი 2-ს გამოცდილებისათვის. პირველად ცხოვრებაში წარმოდგენა არ მაქვს რას გავაკეთებ და სად ვიქნები. ერთი ვიცი - ცოტა დასვენება დავიმსახურე და ასეც ვაპირებ..." - დაწერა თეონა ცხომელიძემ.

ჟურნალისტი 2006 წლიდან მუშაობდა "რუსთავი 2"-ში და "კურიერის" საპარლამენტო კორესპონდენტი იყო. ძირითადად მუშაობდა პოლიტიკურ და სოციალურ თემებზე.

ერთ-ერთი ვერსიით, ცხომელიძეს და ნოდარ მელაძეს, რომელიც "რუსთავი 2"-ის საინფორმაციო სამსახურის უფროსია, დაძაბული ურთიერთობა ჰქონდათ და ჟურნალისტის ტელეკომპანიიდან წასვლა სწორედ ამან გამოიწვია.

შეგახსენებთ, სტრასბურგის სასამართლოს გადაწყვეტილების შემდეგ, "რუსთავი 2" ქიბარ ხალვაშშს გადაეცა, რომელმაც თანამდებობიდან გაათავისუფლა გენერალური დირექტორი ნიკა გვარამია და მის ნაცვლად საკუთარი ადვოკატი, პაატა სალია დანიშნა.