"სოროსი ფრანგი მეგონა, ტყვიაველი ყოფილა" - როგორ ეხმაურებიან "ფეისბუქზე" ოქრუაშვილის განცხადებას "ვარდების რევოლუციაზე"

თავდაცვის ყოფილი მინისტრის, ირაკლი ოქრუაშვილის ფრაზას, რომ 2003 წლის "ვარდების რევოლუცია" მან დააფინანსა, სოციალურ ქსელში ინტერნეტმომხმარებლების სარკასტული კომენტარები და იუმორისტული პოსტები მოჰყვა.

აი, რა კომენტარებს წერენ ინტერნეტმომხმარებლები "ფეისბუქში":

"ისევ ქართველი თუ მოუხაზავდა სოროსს"

"სოროსი ფრანგი მეგონა, ტყვიაველი ყოფილა"

"მკვდარი ზღვაც ამან მოკლა"

"მიშამ ეს თავის დროზე ალბათ მაგრად დაამუშავა. მალე იტყვის ნაპოლეონი ვარო"

"ის ძერაც მაგან მოკლა თურმე"

"კიკუს თუმანი მე მივეცი! ი. ოქრუაშვილი"

თამარ ჩერგოლეიშვილი, ტაბულას დირექტორი:

"ვარდების რევოლუცია არ ვიცი, მაგრამ ბოსტონის დიდი ჩაის სმა და კოლუმბის ექსპედიცია ნაღდად ოქრუაშვილმა დააფინანსა. მგონი გუტენბერგსაც მაგან მისცა ფული, სტამბის გასაჩარხად. თუ არ გჯერათ, ჰკითხეთ"

შეგახსენებთ, პარტია “გამარჯვებული საქართველოს“ ლიდერმა ირაკლი ოქრუაშვილმა ჟურნალისტებთან ისაუბრა, რომ 2003 წელს მთელი კამპანია, „ვარდების რევოლუციის“ ჩათვლით, დაფინანსებული იყო მის მიერ:

„მე მქონდა გარკვეული სახის კავშირები მაშინაც, მანამდეც და მის მერეც. 2003 წელს, კონსპირაციებისა და შეთქმულებების თეორიებს რომ აწყობდით და იძახით, რომ თითქოს სოროსმა დააფინანსა „ვარდების რევოლუცია“, ან ბიძინა ივანიშვილმა, 2003 წლის მთელი კამპანია დაფინანსებული იყო ჩემ მიერ, მაშინაც მქონდა ამის ბერკეტი, ახლაც მაქვს და კიდევ მექნება დიდი ალბათობით“, - განაცხადა ოქრუაშვილმა.