"იმედის" აღმასრულებელ დირექტორად "საზოგადოებრივი მაუწყებლის" ჟურნალისტი დაინიშნა

ტელეკომპანია "იმედის" აღმასრულებელ დირექტორად ჟურნალისტი გიორგი ცხვიტავა დაინიშნა. ბოლოს ის "საზოგადოებრივი მაუწყებლის" ანალიტიკური გადაცემის - "ახალი კვირის" სამხედრო კორესპონდენტი იყო.

როგორც ცხვიტავამ AMBEBI.GE-ს განუცხადა, მუშაობა ამ ეტაპზე "იმედის" საერთო სტრუქტურის შესახებ მიმდინარეობს.

"ყველა განაგრძობს მუშაობას თავის ადგილას. ვმუშაობთ საერთო სტრუქტურაზე. ტელეკომპანიაში არანაირი მნიშვნელოვანი ცვლილება არ იგეგმება. სამი დღეა რაც "იმედში" მოვედი. იქამდე, გარკვეული მოლაპარაკებები გვქონდა. შემოთავაზება პირადად გენერალური დირექტორისგან მივიღე" - განაცხადა ცხვიტავამ.

ტელეკომპანია "იმედის" ხელმძღვანელობა რამდენიმე კვირის წინ შეიცვალა და გენერალური დირექტორის პოზიცია ელდარ მდინარაძემ დაიკავა, რომელიც წლების წინ ბიძინა ივანიშვილის მე-9 არხის ერთ-ერთ ხელმძღვანელად მუშაობდა, შემდეგ კი ვანო ჩხარტიშვილის კუთვნილ ტელეკომპანია “მზეში” დირექტორის პოზიციაზე. ამ საკითხთან დაკავშირებით ცხვიტავამ AMBEBI.GE-ს კითხვას ასე უპასუხა:

"მდინარაძე დაინიშნა სამი თვის წინ. ეს ადამიანი მუშაობდა "მზეში", იყო "მზის" გენერალური დირექტორი. ალბათ "მეცხრე არხშიც" მუშაობდა ადრე. ამ შეკითხვებით მას დაუკავშირდით. მე არანაირ კითხვას არ გავურბივარ აბსოლუტურად. მზად ვარ ნებისმიერ კითხვას ვუპასუხო" - განაცხადა გიორგი ცხვიტავამ.

"იმედის" ახლადდანიშნული აღმასრულებელი დირექტორი სხვადასხვა დროს მუშაობდა ჟურნალისტად ტელეკომპანია "საქართველოსა" და "პირველ არხში" სამხედრო საკითხების მიმართულებით. ბოლოს ის "საზოგადოებრივი მაუწყებლის" ჟურნალისტი იყო.