“ვისოლ ჯგუფი“ საქართველოში ტურიზმის ხელშესაწყობად დაცული ტერიტორიების სააგენტოსთან ერთად კამპანიას იწყებს

გარემოს დაცვისა და სოფლის მეურნეობის სამინისტროს დაცული ტერიტორიების სააგენტოსა და „ვისოლ ჯგუფს“ შორის ურთიერთთანამშრომლობის მემორანდუმი გაფორმდა. მემორანდუმის თანახმად, ორგანიზაციები საქართველოში ტურიზმის პოპულარიზაციის მიზნით, უნიკალური ბუნების გაცნობისა და უსაფრთხო ტურიზმის ხელშესაწყობად, გრძელვადიან საინფორმაციო კამპანიას იწყებენ.

მემორანდუმს ხელი დაცული ტერიტორიების სააგენტოს თავმჯდომარე ვალერიან მჭედლიძემ, „ვისოლის“ გენერალურმა დირექტორმა ვასილ ხორავამ და „ვენდისა“ და „დანკინის“ გენერალურმა დირექტორმა გიორგი მშვილდაძემ მოაწერეს.

„“ვისოლ ჯგუფისათვის“ საქართველოში ტურიზმის ხელშეწყობა შექმნილი ვითარების ფონზე კორპორაციული სოციალური პასუხისმგებლობის პოლიტიკის ძირითადი საზრუნავია. აღნიშნული პროექტით გარემოს დაცვისა და სოფლის მეურნეობის სამინისტროს დაცული ტერიტორიების სააგენტოსთან ერთად გვსურს, ხელი შევუწყოთ როგორც შიდა ტურიზმის განვითარებას, ისე უცხოელი ტურისტების მოზიდვას, საქართველოს უნიკალური ტურისტული რესურსების შესახებ ინფორმაციის აქტიური გავრცელებითა და მოგზაურობის უსაფრთხოების შესახებ ცნობიერების ამაღლების კამპანიით.

პარალელურად, „ვისოლ ჯგუფი“ ცდილობს წვლილი შეიტანოს საქართველოში ტურისტული ინფრასტრუქტურის განვითარების მხრივ და ჩქაროსნული ავტომაგისტრალის გორისა და არგვეთას მონაკვეთზე „დასვენებისა და მომსახურების ცენტრების“ შექმნით, სადაც ყველა საჭირო მომსახურების მიღება ერთ სივრცეშია შესაძლებელი, მოგზაურობას საქართველოში და საქართველოს გავლით გაცილებით უფრო კომფორტულს და სასიამოვნოს ხდის. დღეისათვის ტურიზმის ხელშემწყობი მსგავსი ინფრასტრუქტურის შექმნა სტრატეგიულად მნიშველოვანია, შესაბამისად, გვეამაყება, რომ „ვისოლ ჯგუფს“ თავისი მოკრძალებული წვლილი შეაქვს საქართველოს ეკონომიკის მდგრად განვითარებაში,“ - განაცხადა ვასილ ხორავამ.

ვალერიან მჭედლიძის თქმით, სხვა მიმართულებებთან ერთად, აქცენტები გაკეთდება დაცულ ტერიტორიებზე უსაფრთხოების წესების დაცვის მიმართულებით.

„მემორანდუმის ფარგლებში ბევრი აქტივობა განხორციელდება, რაც ქვეყნისთვის ძალიან მნიშვნელოვანია ეკოტურიზმის განვითარების კუთხით. ეს კამპანია იქნება იმოგზაურე "ვისოლ ჯგუფთან" ერთად საქართველოს დაცულ ტერიტორიებზე, რაც მოგვეხმარება ქვეყნის პოპულარიზაციისა და ეკოტურიზმის განვითარების თვალსაზრისით.“ - განაცხადა ვალერიან მჭედლიძემ.

„ვენდისა“ და „დანკინის“ გენერალური დირექტორის გიორგი მშვილდაძის შეფასებითაც, აღნიშნული პროექტი ქვეყნის ტურიზმის პოპულარიზაციის მხრივ მეტად მნიშვნელოვანია.

პროექტის ფარგლებში, მომზადდება ვიდეო-ბლოგები საქართველოს უნიკალური ბიომრავალფეროვნებით გამორჩეული დაცული ტერიტორიების შესახებ. ბლოგის წამყვანები საზოგადოებას გააცნობენ როგორც პოპულარულ მარშრუტებს, ასევე სამთხო-საფეხმავლო ბილიკებს და დაეხმარებიან, აღმოაჩინონ ახალი მიმართულებები. ამასთან, მაყურებლებს ექნებათ შესაძლებლობა მიიღონ ამომწურავი ინფორმაცია მოგზაურობასთან დაკავშირებული უსაფრთხოების საკითხების შესახებ.

სათავგადასავლო ტურიზმის განვითარების ასოციაციის ხელმძღვანელის ჯონი კაპანაძის განმარტებით, ვიდეო-ბლოგების ნახვის შემდეგ ტურისტებს მარშუტებთან, სერვისებთან და სხვა მსგავს საკითხებთან დაკავშირებით კითხვები აღარ გაუჩნდებათ. მისივე თქმით, მნიშვნელოვანია, რომ ხაზი სეზონურობას გაესვას.

„ყველა დაცული ტერიტორიის შესახებ მივაწვდით ინფორმაციას პოტენციურ მოგზაურსა თუ დამსვენებელს, რათა მან მარტივად შეძლოს ყველა იმ სასურველი ტურისტული მარშუტის მოძიება და სერვისის შესახებ ამომწურავი ინფორმაციის მიღება. მას აღარ უნდა დარჩეს შეკითხვა, როდესაც გადაწყვეტს ამა თუ იმ დაცულ ტერიტორიაზე წასვლას, რა უნდა წაიღოს, რა ტარიფებია, როგორი ტურისტული მარშუტებია, დამატებით რა სერვისს სთავაზობს დაცული ტერიტორია და ა.შ.“ - აღნიშნა ჯონი კაპანაძემ.

საქართველოს დაცული ტერიტორიები 87 სხვადასხვა კატეგორიის დაცულ ტერიტორიას მოიცავს, რაც ჯამურად საქართველოს 9,2%-ს ფართობს შეადგენს. დაცული ტერიტორიები აერთიანებს ქვეყნის მასშტაბით უნიკალური ბიომრავალფეროვნებით გამორჩეულ ბუნებრივ მემკვიდრეობას. მათ შორისაა: პრომეთეს მღვიმე, მარტვილის კანიონი, ოკაცეს კანიონი, ყაზბეგის ეროვნული პარკი, მტირალას ეროვნული პარკი, კოლხეთის ეროვნული პარკი, ბორჯომ-ხარაგაულის ეროვნული პარკი, ვაშლოვანის ეროვნული პარკი, ლაგოდეხის დაცული ტერიტორიები.

ავტორი: ნათია ჩადუნელი

R