როდიდან შეუძლია ქიბარ ხალვაშს რუსთავი 2-ის გადაფორმება - "მხარეს სტრასბურგის სასამართლოს გადაწყვეტილების გასასაჩივრებლად 3 თვის ვადა აქვს"

„საქართველოს უზენაესი სასამართლოს მიერ მიღებული გადაწყვეტილების აღსრულების შეჩერების მოხსნა დამოკიდებულია არა სახელმწიფოზე, არამედ ტელეკომპანიის მესაკუთრეზე - ქიბარ ხალვაშზე, - ამის შესახებ იუსტიციის მინისტრმა თეა წულუკიანმა ბრიფინგზე განაცხადა, სადაც „რუსთავი2“ - ის საქმეზე სტრასბურგის სასამართლოს გადაწყვეტილება გამოაცხადა.

მისი თქმით, ახალი მესაკუთრის გადასაწყვეტია, როდის მოხსნის აღსრულების შემჩერებელ მექანიზმს.

„სახელმწიფოს გადასაწყვეტი არ არის, როდის შეიძლება შეჩერების შესახებ მოხსნის გადაწყვეტილება აღსრულდეს. ეს მთლიანად დამოკიდებულია ტელეკომპანიის იმ მესაკუთრეზე, რომელიც უზენასი სასამართლოს 2017 წლის 2 მარტის გადაწყვეტილებით, არის ქიბარ ხალვაში და მისი კომპანია. ამასთან დაკავშირებით ევროპულმა სასამართლომ ერთხმად თქვა, რომ საკუთრების უფლება არ დარღვეულა, რომ სამათლიანი სასამართლოს უფლება არ დარღვეულა და აქედან გამომდინარე, ახალ მესაკუთრეს აქვს თავისი გადაწყვეტილების თავისუფლება, რაზეც თავად გვეტყვის, ალბათ.

რაც შეეხება იმას, კმაყოფილი ვართ თუ არა, ეს გადაწყვეტილება ამტკიცებს, რისი მოლოდინიც ჩვენს მხარეს ჰქონდა. ჩვენ მიერ სხვადასხვა დროს წარდგენილი 400-ზე მეტ გვერდიანი შესაგებლები, სრულად იქნა გაზიარებული ეროპული სასამართლოს მიერ და დადგინდა, რომ ქართული სასამართლოების გადაწყვეტილებები სამართლიანი და სანდო იყო,“ - განაცხადა წულუკიანმა.

თეა წულუკიანის განცხადებით, მხარეს „რუსთავი 2“-ს საქმეზე სტრასბურგის სასამართლოს გადაწყვეტილების გასასაჩივრებლად 3 თვის ვადა აქვს. როგორც წულუკიანმა განაცხადა, გასაჩივრებას არ ექვემდებარება შეჩერების მექანიზმის მოხსნა.

„რაც შეეხება გადაწყვეტილების ძალაში შესვლას, ერთადერთი ნაწილი ამ გადაწყვეტილების, რომელიც გასაჩივრებას არ ექვემდებარება, არის შეჩერების მექანიზმის მოხსნა. გადაწყვეტილებაში პირდაპირ წერია, რომ ვინაიდან „რუსთავი 2“-ის ყველა სასარჩელო მოთხოვნა დაუშვებლად იქნა ცნობილი, სასამართლო აღარ თვლის საჭიროდ, რომ შეჩერების ღონისძიება იყოს ძალაში და ის არის მოხსნილი. სარეზოლუციო ნაწილიდან ჩანს, რომ ეს გადაწყვეტილება მიღებულ იქნა ერთხმად და შვიდივე მოსამართლის ერთსულოვანი აზრია.

შეჩერების მოხსნის გადაწყვეტილება არ ექვემდებარება გასაჩივრებას და ის დღეიდან არის ძალაში.

შესაბამისად, ჩვენ მხარეები, თუკი რაიმეს გავასაჩივრებთ ამ გადაწყვეტილებიდან, ეს იქნება მხოლოდ და მხოლოდ 6 ხმით ერთის წინააღმდეგ მიღებული გადაწყვეტილება, რომელიც არსებითი გადაწყვეტილებაა. სხვა სადავო აქ არაფერი ჩანს. გასაჩივრების პროცედურები არის შემდეგი: მხარეს გასაჩივრებისთვის 3 თვის ვადა აქვს. თუმცა, დიდი პალატის მიერ გასაჩივრებული საქმის განხილვა ავტომატური არ არის. შუაში არსებობს ე.წ. ფილტრაციის კოლეგია, რომელიც ან დაუშვებს საქმეს განსახილველად დიდ პალატაში, ან არ დაუშვებს.

თქვენ გახსოვთ, რომ ჩვენ ასე გავასაჩივრეთ ვანო მერაბიშვილის საქმეზე გადაწყვეტილება საქართველოს წინააღმდეგ და ეს საქმე მოხვდა იმ 3 თუ 4 პროცენტ საქმეებში, რომელიც ფილტრაციის კოლეგიამ დიდი პალატის განსახილველად დაუშვა. პროცედურა აქაც იქნება იგივე“, - განაცხადა წულუკიანმა.