27
მარტიდღის ზოგადი ასტროლოგიური პროგნოზი
რამდენიმე დღეში ლიზა კაკაბაძე "პალიტრა მედია ჰოლდინგში" ახალ საქმეს შეუდგება. ის, სხვა იურისტებთან ერთად, იმ არამატერიალურ ქონებას დაიცავს, რომელსაც ჰოლდინგის ფარგლებში ყოველდღიურად ათობით პლატფორმის, გამომცემლობის და სხვა კომპანიების თანამშრომლები ქმნიან.
ლიზა 20 წლისაა და თბილისის სახელმწიფო უნივერსიტეტში იურიდიული ფაკულტეტის საერთასორისო სამართლის მიმართულების სტუდენტია. მომავალი იურისტი მიიჩნევს, რომ საქართველოში საავტორო უფლებების დაცვა იმდენად განვითარებული არ არის, როგორც სხვა დემოკრატიულ ქვეყნებში.
"ამ მიმართულებით დავინტერესდი იქიდან გამომდინარე, რომ საქართველოში, როგორც ვიცი, არ არის იმდენად განვითარებული სავტორო უფლებების დაცვა, როგორც სხვა დემოკრატიულ ქვეყანაში. ვფიქრობ, ბევრი სპეციალისტი იქნება საჭირო მომავალში", - განმარტა ლიზა კაკაბაძემ Ambebi.ge-სთან საუბარში.
ლიზამ საკუთარი ინტერესის შესაბამისი კურსიც იპოვა, რომელიც მას არა მხოლოდ ქართულ არამედ ამერიკულ გამოცდილებასაც შესძენდა. როგორც თვითონ იხსენებს, საავტორო უფლებების მიმართულებით ჰარვარდის უნივერსიტეტის აფილირებული კურსის შესახებ იანვარში გაიგო.
კურსი მხოლოდ თბილისის სახელწიფო უნივერსიტეტის სტუდენტებზე იყო გათვლილი, უნივერსიტეტებს შორის გაფორმებული მემორანდუმის საფუძველზე. სწავლების პროცესი 4 თვეზე იყო გათვლილი და დიდწილად ინგლისურ ენაზე მიმდინარეობდა. კურსის გასავლელად 80 სტუდენტი შეირჩა, თუმცა მხოლოდ 59-მა შეძლო მისი წარმატებით დასრულება.
"პალიტრა მედიის" იურიდიული დეპარტამენტის ხელმძღვანელმა ანა სამსონიამ წარმატებულ სტუდენტებს უნიკალური შეთავაზება გაუკეთა - ვისაც თეორიული ცოდნის პრაქტიკაში განხორციელება სურდა, ჰოლდინგში პრაქტიკის გავლის შესაძლებლობა მისცა. ოთხი საუკეთესო კანდიდატი ფინალურ გამოცდაში მიღებული ქულებისა და გასაუბრების შედეგად შეირჩა, ლიზა ერთ-ერთი მათგანია. მასთან ერთად "პალიტრა მედია ჰოლდინგის" საავტორო უფლებებს ჰარვარდის პროგრამის კიდევ სამი კურსდამთავრებული დაიცავს.
"პალიტრა ჯგუფს აქვს მრავალი მიმართულება. ეს არ არის მხოლოდ გამომცემლობა და შესაბამისად, ფართო სპექტრს მოიცავს. აქედან გამომდინარე, ჩემთვის ძალიან საინტერესოა აქ პრაქტიკის გავლა. გარდა ამისა, ის რაც თეორიულად გავიარეთ სასამართლო გადაწყვეტილებები იქნებოდა, კანონები თუ პრინციპები - მაინტერესებს, როგორ მუშაობს პრაქტიკაში, მით უსმეტეს, საქართველოში. ვფიქრობ, რომ ამ ყველაფრის გააზრებაში დამეხმარება ეს პრაქტიკა", - გვითხრა ლიზა კაკაბაძემ.
ანა სამსონიას თქმით, "პალიტრა მედია ჰოლდინგს" კარგად აქვს გაცნობიერებული, თუ რამდენად მნიშვნელოვანია საზოგადოების ცნობიერების ამაღლება, ავტორთა უფლებების დაცვა და ამ უფლებათა პატივისცემის ღირებულებად დანერგვა, ამიტომ აქტიურად უწყობს ხელს ამ სფეროს განვითარებას, მათ შორის, მომავალი სპეციალისტებისთვის პრაქტიკული უნარების შეძენის მიმართულებით.
"პალიტრა მედია ჰოლდინგში ყოველდღიურად იქმნება ინტელექტუალური საკუთრება, რომელსაც ფართო საზოგადოება ეცნობა. ვაცნობიერებთ ჩვენს წვლილს საზოგადოების ცნობიერების ამაღლების, ავტორთა უფლებების დაცვისა და ამ უფლებათა პატივისცემის ღირებულებად დანერგვის საკითხებში და ხელს ვუწყობთ სფეროს განვითარებას. სწორედ ამიტომ ჰარვარდი/თსუ-ს პროგრამის საუკეთესო კურსდამთავრებულებს ვაძლევთ პრაქტიკული გამოცდილების მიღების უნიკალურ შესაძლებლობას მულტიმედია ჰოლდინგში და ამ მხრივ ვაძლიერებთ საავტორო უფლებათა დამცველ სპეციალისტთა საზოგადოებას. ამასთან, ჩვენ კვლავ ვაგრძელებთ მუშაობას, ვგეგმავთ ინოვაციური პლატფორმის შექმნას, რომლის სამიზნე საავტორო უფლებებიცაა", - განაცხადა ანა სამსონიამ.
ჰარვარდის აფილირებული კურსის მოწვეული ლექტორები მარიამ ღუბიანური და ქეთევან ურიდია მიიჩნევენ, რომ "პალიტრა მედიამ" სტუდენტებს თეორიული ცოდნის პრაქტიკულად გამყარებისა და რეალური უნარების შეძენის უნიკალური შესაძლებლობა მისცა.
„ძალიან მოხარული ვარ, რომ ჩვენს შორის ეს თანამშრომლობა შედგა, იმიტომ, რომ ერთია თვითონ კურსის თეორიული განხორციელება, მაგრამ მეორეა მისცე შესაძლებლობა სტუდენტებს, რომ თავისი მიღებული ცოდნა გამოიყენონ.
გარდა ამისა, ვფიქრობ, რომ "პალიტრა მედიის" ამ შემოთავაზების შედეგად სტუდენტების დაინტერესება კიდევ უფრო გაიზრდება, რადგან მათ ექნებათ შესაძლებლობა, ეს ცოდნა გამოიყენონ პრაქტიკული თვალსაზრისით და ექნებათ შესაძლებლობა, რომ დასაქმდნენ ისეთ დიდ ჯგუფში, როგორიც არის "პალიტრა მედია ჰოლდინგი", რადგან მას, ფაქტობრივად, ყველა იმ უფლებასთან და საკუთრებასთან აქვს შეხება, რომლისთვისაც საავტორო უფლებები ძალიან მნიშვნელოვანია", - აღნიშნა მარიამ ღუბიანურმა.
"ჩვენი სტუდენტებისთვის ეს იქნება უმნიშვნელოვანესი. მიუხედავად იმისა, რომ დღეს ბაზარზე იქმნება სხვადასხვა ტიპის პროდუქტი, ამას ცოტა სხვა მასშტაბი სჭირდება - ორგანიზაციას უკვე სხვა მასშტაბისთვის უნდა ჰქონდეს მიღწეული, რომ მას სჭირდებოდეს ინტელექტუალური საკუთრების დაცვა და ჰყავდეს იურისტები ამ მიმართულებით.
"პალიტრა მედიას" კი აქვს ყველა იმ ტიპის საკომუნიკაციო საშუალება, გამომცემლობა, მედია პლატფორმები, რომლებიც ქმნის დამატებით საფუძველსა და დამატებითი ინტერესის საგანს ყოველი ამ მიმართულებით მომუშავე იურისტისთვის, რადგან აქ არ არის მხოლოდ ერთი მიმართულება და შეგიძლია სხვადასხა მიმართულებით განვითარდე", - გვითხრა ქეთევან ურიდიამ.
ლიზა კაკაბაძემ ჯერ არ იცის ჰოლდინგში რომელი მიმართულებით მოუწევს მუშაობა, თუმცა ამბობს, რომ არჩევანის შემთხვევაში, რადიოს ან ონლაინ მედიის მიმართულებით იმუშავებდა და ამ პლატფორმების ინტელექტუალურ საკუთრებას დაიცავდა.
ფოტო: თსუ
