31
მაისიდღის ზოგადი ასტროლოგიური პროგნოზი
ალბათ ბევრს შეუმჩნევია, რომ სასკოლო დაფა უმეტეს შემთხვევაში მუქი მწვანე ფერისაა. შავი და მუქი ყავისფერი დაფებიც არის, თუმცა ბოლო დროს სკოლებში მწვანე დაფას უფრო ხშირად შევხვდებით.
და მაინც, რატომ მუქი მწვანე?
დაფა მუქი შეფერილობის უნდა იყოს, იმიტომ, რომ თეთრი ცარცი მასზე კარგად გამოჩნდეს. აქედან გამომდინარე, იდეალური ვარიანტი უნდა ყოფილიყო შავი ფერის დაფა. მაგრამ ასე არ აღმოჩნდა. ოფთალმოლოგების თქმით, შავ ფერზე თეთრი ფერის კონტრასტი თვალს ღლის. გარდა ამისა, წაშლის შემდეგ, ცარცის თეთრი კვალიც უფრო ცუდად სცილდება და დაფა საერთო ჯამში ჭუჭყიანი ჩანს. ამიტომ აუცილებელი გახდა შავი ფერის სხვა მუქი შეფერილობით ჩანაცვლება.
რაც შეეხება მწვანე ფერს, მისი არჩევის რამდენიმე მიზეზი არსებობს:
ყველასათვის ცნობილია, რომ მწვანე ფერი ადამიანზე საკმაოდ საინტერესო ზემოქმედებას ახდენს: აწყნარებს ნერვულ სისტემას, სძენს სიმშვიდის, სიამოვნებისა და ბუნებასთან სიახლოვის შეგრძნებას, ხსნის თავის ტკივილს, დაღლილობას, გაღიზიანებულობას, აქვეითებს სისხლის წნევას.
ჯერ კიდევ XX საუკუნის შუა ხანებში მეცნიერებმა დაადგინეს, რომ მწვანე შეფერილობა ხელს უწყობს გონებრივ მუშაობასა და ყურადღების კონცენტრაციას. სწორედ ამ თვისებების გამო ენიჭება მწვანე ფერის დაფას სასკოლო პროცესში უპირატესობა.
გარდა ამისა, მწვანე ფერს რეკომენდაციას უწევენ ოფთალმოლოგებიც. სკოლაში ყოფნის დროს როგორც მოსწავლეებს, ასევე მასწავლებელს საათობით უწევთ დაფის ყურება, მწვანე ფერი ყველაზე ნალებად იწვევს თვალის დაძაბვას.
დაფა თანამედროვე სკოლის განუყოფელი ატრიბუტია - ის პირველად სასწავლო დაწესებულებებში XIX საუკუნის დასაწყისში გამოჩნდა. მასწავლებლებს ახლა უკვე, ნაცვლად იმისა, რომ თითოეულ მოსწავლესთან ცალ-ცალკე მისულიყვნენ, შეეძლოთ მთელი კლასისთვის ერთდროულად ეჩვენებინათ ინფორმაცია და ამით ბევრი დრო დაეზოგათ. დაფებს თავდაპირველად ფიქალისგან ან ხისგან ამზადებნენ, რომელსაც შემდეგ შავი საღებავით ფარავდნენ.
მრეწველობის განვითარებასთან ერთად, პლასტმასისა და მეტალის დაფების წარმოებაც დაიწყეს. ლითონის დაფები, მათი მაგნიტური თვისებების გამო, დიდი პოპულარობით სარგებლობდა.
1960-იან წლებში მწვანე დაფებმა ჯერ აშშ-ის სკოლები მოიცვა, შემდეგ კი დასავლეთ ევროპის. მოგვიანებით ისინი აღმოსავლეთ ევროპის სკოლებშიც გავრცელდა. დღეს უკვე შავი ფერის დაფას თითქმის ვერცერთ სკოლაში შეხვდებით.
თუმცა ტექნოლოგიების განვითარება ჩვენს ეპოქაში საგანმანათლებლო დაწესებულებებს მეცხრამეტე და მეოცე საუკუნეებისთვის წარმოუდგენელი შესაძლებლობებს სთავაზობს. ერთ-ერთ ასეთ თანამედროვე მიღწევად შეგვიძლია მივიჩნიოთ SMARTBOARD - ახალი თაობის დაფა, რომელზე ჩვეულებრივი დაფისგან განსხვავებით, მოსწავლეებს შეუძლიათ თითით და სპეციალური სტილუსით ხატონ, ხაზონ, წარადგინონ პროექტები, აჩვენონ ნებისმიერი გამოსახულება კომპიუტერით ან ლეპტოპით. ის პედაგოგს ვიზუალური მასალის ჩვენებით, გაკვეთილის უფრო საინტერესოდ ჩატარებასა და დროის დაზოგვაში ეხმარება, ამასთან ხელს უწყობს მოსწავლეების გონებრივ განვითარებას. ტექნოლოგიების საუკუნეში უამრავი თანამედროვე სკოლა იყენებს ასეთ დაფებს, ისინი არა მხოლოდ საგანმანათლებლო დაწესებულებებში, არამედ ნებისმიერ სამუშაო სივრცეში კომფორტული და გამოსადეგია.
