ქორწილში 13 წლის ბავშვმა თავი აიფეთქა - ავღანეთში გარდაცვლილთა რაოდენობა, შესაძლოა, გაიზარდოს

ავღანეთის აღმოსავლეთით, საქორწინო ცერემონიალზე ტერაქტი მოხდა. „დეილი მეილის“ ინფორმაციით, 13 წლის ბიჭმა აიფეთქა თავი, შედეგად სულ მცირე 5 ადამიანი დაიღუპა, 40-ზე მეტი დაიჭრა. ვარაუდობენ, რომ მსხვერპლი გაიზრდება.

მომხდართან დაკავშირებით პასუხისმგებლობა ჯერ არცერთ ტერორისტულ დაჯგუფებას აუღია. ტერაქტი პაკისტანის საზღვართან ნანგარარის პროვინციაში მოხდა.

გარდაცვლილებს შორის არის ადგილობრივი პოლიციის მაღალჩინოსანი მალიკ ტორიც, რომელიც ქორწილში სტუმრად იმყოფებოდა. ტერაქტის სამიზნე, როგორც ჩანს, სწორედ ტორი იყო.

აფეთქებამდე რამდენიმე დღით ადრე ავღანეთის ხელისუფლებასა და თალიბანს შორის მოლაპარაკებები გაიმართა. შეხვედრა დოჰაში შედგა, მხარეები შეთანხმდნენ, რომ ძალადობას ადგილი აღარ იქნებოდა, უდანაშაულო მსხვერპლთა რაოდენობა კი ნულამდე იქნებოდა დაყვანილი.