საქართველოსა და რუსეთს შორის ავიამიმოსვლა, შესაძლოა, აღდგეს

რუსეთის ხელისუფლებაში არ გამორიცხავენ, რომ ავიამიმოსვლა რუსეთსა და საქართველოს შორის კვლავ აღდგეს - ამის შესახებ kommersant.ru საკუთარ წყაროზე დაყრდნობით წერს.

„თუ საქართველოში სიტუაცია დამშვიდდება, რუსოფობია შეწყდება და ჩვენი ქვეყნის მოქალაქეების უსაფრთხოება გარანტირებული იქნება, ავიამიმოსვლის აღდგენაზე დაიწყება საუბარი,“ - განაცხადა „კომერსანტის“ წყარომ რუსეთის შინაგან საქმეთა სამინისტროდან.

საქართველოსა და რუსეთს შორის ავიამიმოსვლა 8 ივლისიდან შეწყდა. რუსეთის პრეზიდენტმა ვლადიმერ პუტინმა 22 ივნისს ხელი მოაწერა ბრძანებას, რომლის მიხედვით, 8 ივლისიდან რუსულ ავიაკომპანიებს საქართველოს მიმართულებით ფრენები აეკრძალათ.

რაც შეეხება ქართულ ავიაკომპანიებს, რუსეთის მიმართულებით მათი რეისებიც 8 ივლისიდან შეჩერდა. ამის მიზეზი რუსეთის ტრანსპორტის სამინისტროს გადაწყვეტილებაა. როგორც რუსეთის ტრანსპორტის სამინისტროს მიერ გავრცელებულ ინფორმაციაშია აღნიშნული, ამის მიზეზია სათანადო საავიაციო უსაფრთხოების უზრუნველყოფა და ასევე ვადაგადაცილებული დავალიანება.